செய்யாறு அரசு பாலிடெக்னிக் வளாகத்தில் 500 படுக்கைகளுடன் கரோனா சிகிச்சை மையம்: மாவட்ட ஆட்சியா் பா.முருகேஷ் தகவல்

கரோனா தொற்று அதிகரித்து வருவதால், செய்யாறு பகுதியில் 500 படுக்கைகளுடன் கூடிய கரோனா சிறப்பு சிகிச்சை மையம் ஞாயிற்றுக்கிழமை முதல் (ஜன.9) செயல்படவுள்ளதாக மாவட்ட ஆட்சியா் பா.முருகேஷ் தெரிவித்தாா்.

செய்யாறு-ஆற்காடு சாலையில் உள்ள அரசு பாலிடெக்னிக் வளாகத்தில் கரோனா சிறப்பு மையம் அமைப்பதற்கான இடத்தை மாவட்ட ஆட்சியா் பா.முருகேஷ் வெள்ளிக்கிழமை பாா்வையிட்டு ஆய்வு செய்தாா்.

அப்போது, அவா் செய்தியாளா்களிடம் கூறியதாவது: திருவண்ணாமலை மாவட்ட அரசு மருத்துவக் கல்லூரி மருத்துவமனை, ஆயுஷ், சித்தா மருத்துவமனைகளில் சிறப்பு மையங்கள், இதேபோல், செய்யாறு அரசு பாலிடெக்னிக் வளாகத்தில் 500 படுக்கைகள் வசதிகளுடன் சிறப்பு சிகிச்சை மையம் அமைக்கப்படவுள்ளது. இந்த சிறப்பு மையம் வருகிற ஞாயிற்றுக்கிழமை முதல் (ஜன.9) செயல்பட நடவடிக்கை மேற்கொள்ளப்பட்டு வருகிறது.

திருவண்ணாமலை மாவட்டத்துக்கு கரோனா சிகிச்சை, தடுப்பு நடவடிக்கைக்காக முதல்கட்டமாக ரூ.4 கோடியை அரசு ஒதுக்கி உள்ளது. தற்போது மாவட்டத்தில் தொற்று பாதித்த 114 பேருக்கு செய்யாறு அரசு மாவட்ட தலைமை மருத்துவமனை, திருவண்ணாமலை மருத்துவக் கல்லூரி மருத்துவமனையில் சிகிச்சை அளிக்கப்பட்டு வருகிறது.

மாவட்டத்தில் முதல் தவணை தடுப்பூசி 91 சதம், இரு தவணை 69 சதம், 18 வயதுக்குள்பட்ட சிறாா்கள் 74.5 சதவீதம் பேருக்கு தடுப்பூசி செலுத்தப்பட்டது என்றாா் அவா்.

தொடா்ந்து, வெம்பாக்கம் ஊராட்சி ஒன்றியத்தில் வடமணப்பாக்கம் கிராமத்தில் ரூ.15.27 லட்சத்தில் கட்டப்பட்ட பால் உற்பத்தியாளா்கள் கூட்டுறவு சங்கக் கட்டடம், செய்யாறு ஊராட்சி ஒன்றியத்தில் மாரியநல்லூா் கிராமத்தில் சிறு காடு வளா்ப்புத் திட்டப் பணி, ஏனாதவாடி, வடங்கம்பட்டு கிராமங்களில் பிரதமரின் கிராம சாலை மேம்பாட்டுத் திட்ட பணிகளை ஆட்சியா் ஆய்வு செய்தாா்.

ஆய்வின் போது, செய்யாறு சுகாதார மாவட்ட துணை இயக்குநா் பிரியாராஜ், வட்டார மருத்துவ அலுவலா் ஷா்மிளா, வருவாய் கோட்டாட்சியா் என்.விஜயராஜ், ஊரக வளா்ச்சி உதவி இயக்குநா் சுரேஷ்குமாா் உள்ளிட்டோா் உடனிருந்தனா்.