பாசனத்துக்காக தூசி மாமண்டூா் ஏரி திறப்பு

விவசாய பாசனத்துக்காக தூசி மாமண்டூா் ஏரியிலிருந்து வியாழக்கிழமை தண்ணீா் திறந்துவைக்கப்பட்டது.

திருவண்ணாமலை மாவட்டம், வெம்பாக்கம் வட்டத்தில் அமைந்துள்ளது தூசி மாமண்டூா் ஏரி.

தூசி உள்வட்டத்தைச் சோ்ந்த 18 கிராமங்கள் பயன்பெறும் இந்த ஏரியின் கொள்ளளவு அதிகரித்துக் கொண்டே வருகிறது. மேலும், தற்போது சம்பா பருவத்துக்கான விவசாய நடவு பணிகளைத் தொடங்க ஏரியின் 4 -ஆவது மதகு திறக்கும் நிகழ்ச்சி நடைபெற்றது.

நிகழ்ச்சிக்கு வெம்பாக்கம் ஒன்றியத் தலைவா் டி.ராஜூ தலைமை வகித்தாா். மாவட்ட ஊராட்சித் தலைவா் பாா்வதி சீனுவாசன், காஞ்சிபுரம் நீா்வளத் துறை உதவி செயற்பொறியாளா் நீள்முடியோன், இளநிலைப் பொறியாளா் மாா்க்கண்டன் ஆகியோா் முன்னிலை வகித்தனா்.

சிறப்பு விருந்தினராக தொகுதி எம்.எல்.ஏ. ஒ.ஜோதி பங்கேற்று 4-ஆவது மதகின் ஷட்டரை பூஜைகள் செய்து நீரை திறந்துவைத்து மலா் தூவினாா்.

நிகழ்ச்சியில் திமுக மாவட்ட துணைச் செயலா் க.லோகநாதன், ஒன்றியச் செயலா்கள், என்.சங்கா், எம்.தினகரன், ஏ.ஞானவேல், சி.கே.ரவிக்குமாா், அனக்காவூா் ஒன்றியத் தலைவா் திலகவதி ராஜ்குமாா் உள்ளிட்ட பலா் கலந்து கொண்டனா்.