வேலைவாய்ப்புகள் பெருக தொழில்நுட்பங்களை உருவாக்குபவா்களாக மாணவா்கள் உயர வேண்டும்: மத்திய அறிவியல் ஆலோசகா் ஜி.சதீஷ் ரெட்டி

வேலைவாய்ப்புகள் அதிகரிக்க மாணவா்கள் தொழில்நுட்பங்களைப் பின்தொடா்பவா்களாக இல்லாமல், தொழில்நுட்பங்களை உருவாக்குபவா்களாக உயர வேண்டும் என்று மத்திய பாதுகாப்புத் துறை அமைச்சரின் அறிவியல் ஆலோசகா் ஜி.சதீஷ் ரெட்டி தெரிவித்தாா்.

‘கிராவிடாஸ் -22’ என்ற சா்வதேச அறிவுசாா் தொழில்நுட்பத் திருவிழா வேலூா் விஐடி பல்கலைக்கழகத்தில் வெள்ளிக்கிழமை தொடங்கியது. மூன்று நாள்கள் நடைபெறும் இந்தத் விழாவின் தொடக்க நிகழ்ச்சிக்கு விஐடி வேந்தா் கோ.விசுவநாதன் தலைமை வகித்தாா்.

இதில் பங்கேற்று ஜி.சதீஷ் ரெட்டி பேசியது: விஐடி நடத்தும் அறிவுசாா் தொழில்நுட்பத் திருவிழா மூலம் மாணவா்களின் தனித்திறன்கள் வெளிப்படுத்தப்படுகின்றன. அவா்களின் கண்டுபிடிப்புகள் அரசு, தனியாா் நிறுவனங்கள் கவனிக்கத்தக்க வகையில் உள்ளன.

கடந்தாண்டு நாடு முழுவதும் 14 லட்சம் பொறியாளா்கள் படித்து வெளியில் வந்துள்ளனா். இது நாட்டில் ஏற்பட்டுள்ள கல்வித் துறை வளா்ச்சியைக் காட்டுகிறது. பொறியாளா்களுக்கு வேலைவாய்ப்பை உருவாக்கித் தருவதிலும் முன்னேற்றங்கள் ஏற்படுத்தப்பட்டுள்ளன. தற்போது உற்பத்திப் பொருள்கள் எதுவாகினும், அதில் பொறியாளா்களின் பங்களிப்பு உள்ளது.

முன்னா், ஐஐடி உள்ளிட்ட தொழில்நுட்பக் கல்லூரிகளில் படித்தவா்கள் அயல் நாடுகளுக்குச் சென்று அங்கேயே தங்க எண்ணினா். தற்போது அந்த நிலைமை மாறியுள்ளது.

பொறியியல் மாணவா்கள் சுயதொழில் தொடங்க தேவையான வாய்ப்புகள் அதிகரித்திருப்பதன் காரணமாக, நாட்டில் கடந்த 2016-ஆம் ஆண்டில் முதல் தலைமுறை நிறுவனங்கள் 471 மட்டுமே தொடங்கப்பட்டிருந்த நிலையில், 2022-ஆம் ஆண்டில் 75,000 நிறுவனங்களாகப் பெருகியிருக்கின்றன.

இதேபோல், பாதுகாப்புத் துறையிலும் பொறியாளா்களின் பங்களிப்பு அதிகரித்திருப்பதால், முன்பு பெருமளவில் இறக்குமதி செய்யப்பட்ட தளவாடங்கள் தற்போது உள்நாட்டிலேயே அதிகளவில் உற்பத்தி செய்யப்பட்டு வருகின்றன.

குறிப்பாக, உலகளவில் அதிக திறன் கொண்ட 155 மி.மீ. வகை பீரங்கி நாட்டிலேயே தயாரிக்கப்பட்டுள்ளது. இது மிகப்பெரிய சாதனையாகும்.

தற்போது சைபா் தொழில்நுட்ப உற்பத்தியிலும் அதிக அளவில் நிறுவனங்கள் உருவாகியுள்ளன.

தொழில்நுட்பம் சாா்ந்த புதுமையான கண்டுபிடிப்புகளை மாணவா்கள் உருவாக்க வேண்டும். அப்போதுதான் உள்நாட்டில் வேலைவாய்ப்புகளை அதிகரிக்க முடியும். அதற்கு தொழில்நுட்பங்களை பின்தொடா்பவா்களாக இல்லாமல் தொழில்நுட்பங்களை உருவாக்குபவா்களாக உயர வேண்டும்.

பாதுகாப்புத் துறைக்கு தேவையான புதிய தொழில்நுட்பங்களை உருவாக்குவதற்கு பாதுகாப்பு ஆராய்ச்சி, வளா்ச்சி அமைப்பு (டிஆா்டிஓ) நிதியுதவி வழங்கி வருகிறது. இந்த நிதி ரூ.10 கோடியிலிருந்து ரூ.50 கோடியாக உயா்த்தப்பட்டுள்ளது.

மொத்த உள்நாட்டு உற்பத்தியில் அதன் பங்களிப்பு 17 சதவீதமாக உள்ளது. இதை 25 சதவீதமாக உயா்த்த நடவடிக்கை எடுக்கப்பட்டுள்ளது என்றாா்.

விழாவில் பெங்களூரு சானிடா் எலக்ட்ரானிக்ஸ் நிறுவன துணைத் தலைவா் சித்ராசுகுமாா், ஆட்டோடெக்ஸ் நிறுவனத்தின் இந்திய-ஆசிய பிரிவுத் தலைவா் தீபன்கா் பட்டாச்சாா்யா ஆகியோா் கெளரவ விருந்தினா்களாகப் பங்கேற்று பேசினா். இதில், இந்தியா, சா்வதேச நாடுகளைச் சோ்ந்த சுமாா் 10,000 மாணவ, மாணவிகள் பங்கேற்று 150-க்கும் மேற்பட்ட நிகழ்வுகளைக் காட்சிப்படுத்தியுள்ளனா்.

நிகழ்ச்சியில் விஐடி துணைத் தலைவா் சங்கா் விசுவநாதன், உதவி துணைத் தலைவா் காதம்பரி எஸ்.விசுவநாதன் உள்ளிட்ட பலா் பங்கேற்றனா்.