அரசுப் பள்ளி மாணவா்களுக்கான மாநில அளவிலான அறிவியல் கண்காட்சி

அரசுப் பள்ளி மாணவா்களுக்கான மாநில அளவிலான அறிவியல் கண்காட்சி கோவையில் வெள்ளிக்கிழமை நடைபெற்றது.

கோவை ஹிந்துஸ்தான் கலைக் கல்லூரியில் நடைபெற்ற இக்கண்காட்சியை கூடுதல் ஆட்சியா் (வளா்ச்சி) சங்கேத் பல்வந்த் வாகே தொடங்கிவைத்தாா்.

இதில், அரசுப் பள்ளிகளில் 8-ஆம் வகுப்பு முதல் 10-ஆம் வகுப்பு வரை படிக்கும் மாணவ, மாணவிகள் பங்கேற்று தங்களது படைப்புகளைக் காட்சிப்படுத்தியிருந்தனா்.

பள்ளி மாணவா்களுக்கு குழு மற்றும் தனிநபா் பிரிவிலும், ஆசிரியா்களின் அறிவியல் படைப்புகளுக்கும் தனித்தனி அரங்குகள் ஒதுக்கப்பட்டிருந்தன. இதில், ஈரோட்டைச் சோ்ந்த மாணவிகள் எல்லை தாண்டி ஊடுருவ முயன்றால் அவா்களை செயற்கை நுண்ணறிவு கொண்ட கண்காணிப்பு கேமரா மூலம் கண்காணிப்பது, அதனுடன் இணைந்து தானியங்கி துப்பாக்கி மூலம் அவா்களை சுட்டு விரட்டுவது போன்ற படைப்புகளைக் காட்சிப்படுத்தியிருந்தனா்.

இதேபோல, கடலூரைச் சோ்ந்த அரசுப் பள்ளி மாணவா் மேம்படுத்தப்பட்ட தகவல் தொடா்பு கொண்ட சந்திரயான்-3 விண்கலம் நிலவில் தரையிறங்கும் லேண்டா் மற்றும் ரோவருடன் எவ்வாறு தொடா்பு கொள்வது, அங்குள்ள வாயுக்களை அளவீடும் கருவி, செயற்கை நுண்ணறிவு மூலம் தானாக செயல்பட வைத்தல், இரவில் நிலவும் கடும் குளிரில் இருந்து ரோவரை எவ்வாறு பாதுகாப்பது குறித்த படைப்புகளைக் காட்சிப்படுத்தியிருந்தாா்.

கண்காட்சியில் தோ்வு செய்யப்படும் மாணவா்கள் தென்னிந்திய அளவில் நடைபெறும் அறிவியல் கண்காட்சியில் பங்கேற்பா் என்று பள்ளி கல்வித் துறை அதிகாரிகள் தொரிவித்தனா்.

இதில், முதன்மைக் கல்வி அலுவலா் பாலமுரளி, ஹிந்துஸ்தான் கலை, அறிவியல் கல்லூரி தாளாளா் சரஸ்வதி கண்ணையன் உள்ளிட்டோா் கலந்துகொண்டனா்.