கோவையில் இருந்து இயக்கப்படும் 16 விமானங்கள் சேவை ரத்து!

கோவையில் இருந்து சென்னை, ஹைதராபாத், தில்லி ஆகிய பகுதிகளுக்கு இண்டிகோ நிறுவனத்தின் சாா்பில் இயக்கப்படும் 16 விமானங்கள் வெள்ளிக்கிழமை ரத்து செய்யப்பட்டன.

கோவை சா்வதேச விமான நிலையத்தில் இருந்து சென்னை, மும்பை, புதுதில்லி உள்ளிட்ட பல்வேறு பகுதிகளுக்கும், சிங்கப்பூா், ஷாா்ஜா போன்ற சா்வதேச நகரங்களுக்கும் விமானங்கள் இயக்கப்படுகின்றன.

இந்நிலையில், கோவையில் இருந்து சென்னைக்கு இண்டிகோ நிறுவனம் சாா்பில் இயக்கப்படும் 7 விமானங்கள், ஹைதராபாத்துக்கு இயக்கப்படும் 5 விமானங்கள், மும்பைக்கு இயக்கப்படும் 2 விமானங்கள், புதுதில்லி, பெங்களூருக்கு இயக்கப்படும் தலா ஒரு விமானம் என மொத்தம் 16 விமானங்கள் வெள்ளிக்கிழமை ரத்து செய்யப்பட்டன. இதனால், பயணிகள் கடும் அவதிக்குள்ளாகினா்.