பேருந்தில் பெண் கழுத்திலிருந்த 10 பவுன் திருட்டு

கோவையில் பேருந்தில்  பெண் அணிந்திருந்த 10 பவுன் தங்கச் சங்கிலியை மர்ம நபர்கள் திருடிச் சென்றனர்.

இதுகுறித்து போலீஸார் கூறியது:

சேலம் மாவட்டம், ஓமலூர், டிஎன்எஸ்பி காலனியைச் சேர்ந்தவர் ராஜகோபால். இவரது மனைவி ஜெகதாம்பாள்(60). ஓய்வு பெற்ற ஆசிரியை. இவர், கடந்த வெள்ளிக்கிழமை தனது மகன், மருமகளுடன் கோவை வந்தார். புருக்பாண்ட் சாலையில் உள்ள வணிக வளாகத்துக்கு அனைவரும் பொருள்கள் வாங்கச் சென்றனர்.

பிறகு அங்கிருந்து உக்கடத்துக்கு மாநகரப் பேருந்தில் சென்றனர். உக்கடம் பேருந்து நிலையத்தில் பேருந்திலிருந்து இறங்கியபோது, ஜெகதாம்பாள் தனது கழுத்தில் அணிந்திருந்த 10 பவுன் தங்கச் சங்கிலியை மர்ம நபர்கள் திருடிச் சென்றனர். போலீஸார் வழக்குப் பதிவு செய்து விசாரிக்கின்றனர்.