உடல் எடையை குறைப்பதன் மூலமாக முதுகு, மூட்டு வலியைத் தவிர்க்கலாம்: டாக்டர் டேவிட் வி.ராஜன்

உடல் எடை பராமரிப்பு, முறையான உணவுப் பழக்கம், உடற்பயிற்சி மூலம் இளம் பெண்களுக்கு ஏற்படும் முதுகு, மூட்டு வலியைத் தவிர்க்கலாம் என்று ஆர்தோ ஒன் மருத்துவமனைத் தலைவர் டாக்டர் டேவிட் வி.ராஜன் தெரிவித்துள்ளார்.
   இது குறித்து அவர் கூறியதாவது: 
  எலும்புப் புரை, கீல்வாதம், முதுகு மற்றும் மூட்டு வலி போன்றவை தற்போது வயதானவர்களுக்கு மட்டும் இல்லாமல் நடுத்தர வயதினருக்கும் ஏற்படுகிறது. இதற்கு காரணம் வளரும் பருவத்தில் தசை மற்றும் எலும்புகள் பலவீனமாக இருப்பதே காரணம். 20 வயதுடைய இளம் பெண்கள் தற்போது மூட்டு வலி மற்றும் முதுகு வலி போன்ற பிரச்னைகளால் அவதிப்படுகிறார்கள். பெண்களுக்கு உடலில் உள்ள ஹார்மோன் ஈஸ்ட்ரோஜென் என்பது முக்கிய பங்கு வகிக்கிறது.
  இது மூட்டுக்களைப் பாதுகாத்தல்,  வீக்கம், எலும்பு முறிவு போன்றவற்றில் இருந்து பாதுகாக்கிறது. இது எலும்பு ஆரோக்கியத்திற்கு உதவுகிறது. தற்போது ஹார்மோன் மாற்றங்கள் காரணமாக ஈஸ்ட்ரோஜென் அளவு குறைவதாலும் மூட்டு தொடர்பான பல்வேறு பிரச்னைகள் இளம் பெண்களுக்கு வருகிறது. இளம் வயதினர் சிகிச்சைக்கு வரும்போது மசாஜ் சிகிச்சை, ஸ்பா சிகிச்சை மற்றும் யோகா போன்ற பல்வேறு சிகிச்சை முறைகளை தேர்வு செய்கிறார்கள். கடுமையான கீல்வாதம் மற்றும் முதுகு வலி இருந்தால் மட்டுமே அவர்கள் அறுவை சிகிச்சைக்கு பரிந்துரைக்கப்படுகிறார்கள்.
 சரியான உணவு முறை, உடற்பயிற்சி, தேவையான தூக்கம் மற்றும்  உடல் எடை பராமரிப்பு ஆகியவை இருந்தால் இளம் வயதில் மூட்டு, தசை தொடர்பான எந்தப் பிரச்னைகளும் வராமல் தடுக்கலாம் என்றார்.