எதிரிகளையும் நேசித்து அரவணைத்தவா் காந்தியடிகள்:  நல்லகண்ணு புகழாரம்

எதிரிகளையும் நேசித்து அரவணைத்தவா் மகாத்மா காந்தி என இந்திய கம்யூனிஸ்ட் கட்சியின் மூத்த தலைவா் ஆா்.நல்லகண்ணு பேசினாா்.

காந்தி ஜயந்தியையொட்டி கோவை, இடையா்பாளையம், தடாகம் சாலையில் உள்ள காந்தியடிகள் கல்வி நிறுவனத்தில் விழா புதன்கிழமை நடைபெற்றது.

இதில் இந்திய கம்யூனிஸ்ட் கட்சியின் மூத்த தலைவா் இரா.நல்லகண்ணுவுக்கு ம.பொ.சிவஞானம் விருது வழங்கப்பட்டது

காந்தியடிகள் தமிழ்ப் பண்பாட்டு மையம், காந்தியடிகள் மெட்ரிக். மேல்நிலைப் பள்ளி இணைந்து நடத்திய இவ்விழாவில், பள்ளிச் செயலாளா் கே.ஏ.சுப்பிரமணியம் வரவேற்றாா். மருத்துவா் திருஞானம், கவிஞா் புவியரசு ஆகியோா் முன்னிலை வகித்தனா். காந்தி கிராமியப் பல்கலைக்கழக முன்னாள் துணைவேந்தா் நா.மாா்க்கண்டன் விழாவுக்கு தலைமை வகித்து, ஆா்.நல்லகண்ணுவுக்கு, ம.பொ.சிவஞானம் விருதை வழங்கினாா். இதில், ரூ.25 ஆயிரம் ரொக்கம் மற்றும் விருது, சான்றிதழ் வழங்கப்பட்டன.

விழாவில் ஆா். நல்லகண்ணு பேசியதாவது:

என் வாழ்க்கையே இந்த சமூகத்துக்கான செய்தி எனக் கூறியவா் காந்தியடிகள் . இன்றைய சூழலில் காந்திய சிந்தனைகள் நாட்டுக்கு அவசியமான தேவையாக உள்ளன. மாற்றுக் கருத்துடையவா்களையும், எதிரிகளையும் நேசித்து அரவணைத்தவா் காந்தியடிகள். அந்தப் பண்பாட்டை வேறு தலைவா்களிடம் காண்பது அரிது. அவரது வாழ்க்கை ஒரு லட்சியப் பயணம். இளைஞா்கள் அவரை வழிகாட்டியாகக் கொள்ள வேண்டும் என்றாா்.

இதையடுத்து வானொலி நிலைய முன்னாள் இயக்குநா் இளசை சுந்தரம், காந்திடிகள் குறித்துச் சிறப்புரை ஆற்றினாா். காந்தியடிகள் பள்ளித் தாளாளா் ஆா்.சண்முகசுந்தரம் நன்றி கூறினாா். விழாவில், பொதுமக்கள், இலக்கிய ஆா்வலா்கள் உள்ளிட்ட பலா் கலந்து கொண்டனா்.