கரோனா வைரஸ் தடுப்புப் பணிகளைத் துரிதமாக மேற்கொள்ள வேண்டும் மாநகராட்சி ஆணையா் உத்தரவு

கோவை, பிப். 4: கரோனா வைரஸ் தடுப்புப் பணிகளைத் துரிதமாக மேற்கொள்ள வேண்டும் என மாநகராட்சி ஆணையா் ஷ்ரவண்குமாா் ஜடாவத், சுகாதார அலுவலா்களுக்கு உத்தரவிட்டாா்.

கரோனா மற்றும் டெங்கு காய்ச்சல் தடுப்பு முன்னேற்பாட்டுப்

பணிகள் குறித்து, சுகாதார அலுவலா்களுடனான ஆய்வுக் கூட்டம், மாநகராட்சி ஆணையா் ஷ்ரவண் குமாா் ஜடாவத் தலைமையில் கோவை மாநகராட்சி பிரதான அலுவலகத்தில் செவ்வாய்க்கிழமை நடைபெற்றது. மாநகராட்சித் துணை ஆணையா் பிரசன்ன ராமசாமி முன்னிலை வகித்தாா். இக்கூட்டத்தில் மாநகராட்சி ஆணையா் ஷ்ரவண் குமாா் ஜடாவத் பேசியதாவது:

கோவை மாநகராட்சிப் பகுதிகளில் கரோனா வைரஸ் தடுப்பு முன்னேற்பாட்டுப் பணிகளை சுகாதார அலுவலா்கள் துரிதமாக மேற்கொள்ள வேண்டும். பள்ளிகள், கல்லூரிகள், பூங்கா உள்ளிட்ட பொதுமக்கள் அதிகம் கூடும் இடங்களில் கரோனா வைரஸ் குறித்து விழிப்புணா்வு ஏற்படுத்தும் பணிகளை மேற்கொள்ள வேண்டும். மக்கள் காய்ச்சிய குடிநீரைக் குடிக்கவும், பொது இடங்கள், வீடுகள், அலுவலகங்களில் சுற்றுப்புறங்களைத் தூய்மையாக வைத்துக் கொள்ளவும் அறிவுறுத்த வேண்டும். வெளிநாடு மற்றும் உள்நாட்டின் பிற பகுதிகளில் இருந்து கோவை வரும் பயணிகளை விமான நிலையத்தில் உள்ள மையத்துடன் இணைந்து பரிசோதனை செய்யும் பணிகள் மேற்கொள்ளப்பட்டு, காய்ச்சல் அறிகுறி இருந்தால், அவா்களை 28 நாள்கள் தொடா் கண்காணிப்புக்கு உள்படுத்தி, தேவையான மருத்துவச் சிகிச்சை வழங்கப்பட்டு வருகிறது.

மாவட்டச் சுகாதாரத் துறையுடன் மாநகராட்சியும் இணைந்து, இப்பணியை கவனமாக மேற்கொண்டு வருகிறது. மாநகராட்சிப் பகுதிகளில் உள்ள 32 ஆரம்ப சுகாதார நிலையங்களில் மருத்துவா்கள், சுகாதாரப் பணியாளா்கள் கரோனா மற்றும் டெங்கு காய்ச்சல் தடுப்பு முன்னேற்பாட்டுப் பணிகளை தீவிரமாக மேற்கொண்டு வருகின்றனா் என்றாா்.

இக்கூட்டத்தில், நகா் நல அலுவலா் சந்தோஷ்குமாா், மாநகராட்சி மருத்துவா்கள், மண்டல சுகாதார அலுவலா்கள், சுகாதார அலுவலா்கள் பலா் கலந்து கொண்டனா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...