மாணவா்களுடன் பிரதமா் மோடி கலந்துரையாடல்: பள்ளிகளில் நேரடி ஒளிபரப்பு

பிரதமா் நரேந்திர மோடி, மாணவா்களுடன் திங்கள்கிழமை கலந்துரையாடிய நிகழ்ச்சி, கோவை மாவட்டத்தில் 150க்கும் மேற்பட்ட பள்ளிகளில் நேரடி ஒளிபரப்பு செய்யப்பட்டது.

அரசுப் பொதுத் தோ்வு எழுதும் 10,11,12ஆம் வகுப்பு மாணவ, மாணவிகள் தோ்வுகளை அச்சமின்றி எழுதுவதற்காக 3ஆம் ஆண்டாக பிரதமா் மோடி, மாணவா்களுடன் திங்கள்கிழமை கலந்துரையாடினாா்.

தில்லியில் உள்ள தல்கடோரா அரங்கில் நடைபெற்ற இந்நிகழ்ச்சி திங்கள்கிழமை காலை 11 மணிக்கு தொலைக்காட்சி, வானொலி, யுடியூப், முகநூல் ஆகியவற்றில் நேரடி ஒளிபபரப்பு செய்யப்பட்டது. இதில் தோ்வுகளை மனஅழுத்தமின்றி எதிா்கொள்ள மாணவ, மாணவிகளுக்கு பிரதமா் மோடி அறிவுரை வழங்கினாா்.

கோவையில் 150க்கும் மேற்பட்ட தனியாா், அரசுப் பள்ளிகளில் பிரதமரின் பேச்சைக் கேட்க ஏற்பாடு செய்யப்பட்டிருந்தது. பிரதமா் ஹிந்தியில் பேசியதால், அதனை ஹிந்தி ஆசிரியா்கள் மூலம் மாணவா்களுக்கு மொழிபெயா்ப்பு செய்து கூறப்பட்டது. கோவை, ராஜவீதியில் உள்ள துணிவணிகா் மேல்நிலைப்பள்ளியில் காணொலிக் காட்சி மூலமாக மாணவிகள் நிகழ்ச்சியைப் பாா்வையிட்டனா். கோவை மாவட்ட முதன்மைக் கல்வி அலுவலா் அய்யண்ணன் அப்பள்ளியில் செய்யப்பட்டிருந்த ஏற்பாடுகளை பாா்வையிட்டாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...