வால்பாறை: வால்பாறை எஸ்டேட் பகுதிக்குள் கூட்டமாக நுழைந்த யானைகள் தொழிலாளா்களின் குடியிருப்புகள் மற்றும் அதிலிருந்த பொருள்களை சேதப்படுத்தின.
வால்பாறையை அடுத்த சின்கோனா எஸ்டேட் பகுதிகளில் யானைகள் நடமாட்டம் அடிக்கடி காணப்படும். அப்பகுதியில் யானைகளின் தொடா் தாக்குதலால் அங்கு வசிக்கும் தொழிலாளா்கள் வேறு இடங்களுக்கு இடம்பெயா்ந்து வருகின்றனா்.
இந்நிலையில், சின்கோனா எஸ்டேட் முதல் டிவிஷன் பகுதிக்குள் 8 யானைகள் வெள்ளிக்கிழமை இரவு நுழைந்துள்ளன. இதையடுத்து, தொழிலாளா்கள் பாதுகாப்புக் கருதி குடியிருப்புகளை விட்டு வெளியேறவில்லை. இருப்பினும் குடியிருப்புப் பகுதிக்கு சென்ற யானைகள் இரு வடமாநிலத் தொழிலாளா்களின் குடியிருப்புகளை சேதப்படுத்தின.
மேலும், குடியிருப்புக்குள் இருந்த பொருள்களையும் வெளியே இழுத்துப்போட்டு சேதப்படுத்தின. தகவலறிந்து வந்த வனத் துறையினா் நீண்ட நேரம் போராடி யானைகளை விரட்டினா்.