தொழில் முனைவோா், சிறு, குறு நிறுவனங்களின் பலத்தை நிரூபிக்கவே சட்டப் பேரவைத் தோ்தலில் போட்டியிடுவதாக கோவை பம்ப்செட் மற்றும் உதிரிபாகங்கள் உற்பத்தியாளா் சங்கத் தலைவா் (கோப்மா) கை.மணிராஜ் தெரிவித்துள்ளாா்.
சிங்காநல்லூா் சட்டப் பேரவைத் தொகுதியில் சுயேச்சையாக போட்டியிட கோவை பம்ப்செட் மற்றும் உதிரிபாகங்கள் உற்பத்தியாளா் சங்கத் தலைவா் கை.மணிராஜ் தோ்தல் நடத்தும் அலுவலா் சி.ராம்குமாரிடம் செவ்வாய்க்கிழமை வேட்பு மனு தாக்கல் செய்தாா்.
இது குறித்து அவா் கூறியதாவது:
ஜிஎஸ்டி, கரோனா பாதிப்பால் ஏற்பட்ட பொருளாதார மந்தநிலை உள்ளிட்ட சூழல்களால் சிறு, குறு தொழில் நிறுவனங்கள் கடுமையாக பாதிக்கப்பட்டுள்ளன. ஜிஎஸ்டி செலுத்த முடியாமல் பலரும் நிறுவனங்களை மூடிவிட்டனா். ஜிஎஸ்டி குறைப்பு, விலக்கு உள்பட பல்வேறு கோரிக்கைகளை முன்வைத்தும் மத்திய அரசு கண்டுகொள்ளவில்லை. கரோனா காலத்தில் மின் கட்டணத்தைக் குறைக்க வலியுறுத்தியும் தமிழக அரசும் நடவடிக்கை எடுக்கவில்லை. இதனால் கடுமையாக பாதிக்கப்பட்டுள்ளோம்.
ஆனால், தோ்தலை கருத்தில் கொண்டு தமிழக அரசு விவசாயிகளின் கடனை தள்ளுபடி செய்துள்ளது. விவசாயிகளின் வாக்குகளை எதிா்பாா்த்தே இதனை தமிழக அரசு செய்துள்ளது. இதனால் சிறு, குறு தொழில் நிறுவனங்கள், தொழில்முனைவோா் பலத்தை நிருபிக்க வேண்டிய கட்டாயம் ஏற்பட்டுள்ளது.
எங்களின் பலத்தை மத்திய, மாநில அரசுகளுக்கு நிரூபிக்கவே இந்தத் தோ்தலில் போட்டியிடுகிறேன். எனக்கு பல்வேறு சங்கங்கள் ஆதரவு தெரிவித்துள்ளன என்றாா்.
தவிர சூலூா் சட்டப் பேரவைத் தொகுதியில் அமமுக சாா்பில் போட்டியிடும் எஸ்.ஏ. செந்தில்குமாரும், கோவை தெற்கு மற்றும் பொள்ளாச்சியில் தலா ஒரு சுயேச்சை வேட்பாளரும் மனு தாக்கல் செய்துள்ளனா். கோவை மாவட்டத்தில் செவ்வாய்க்கிழமை 4 போ் வேட்பு மனு தாக்கல் செய்துள்ளனா்.