கோவை மக்கள் என்னை தங்களில் ஒருவனாக நினைத்து வெகுநாளாயிற்று: மக்கள் நீதி மய்யம் தலைவா் கமல்ஹாசன்

கோவை மக்கள் என்னை தங்களில் ஒருவனாக நினைத்து வெகுநாளாயிற்று என்று மக்கள் நீதி மய்யம் தலைவா் கமல்ஹாசன் கூறினாா்.

கோவையில் புதன்கிழமை நடைபெற்ற நிகழ்ச்சியில் தான் போட்டியிடும் தெற்கு தொகுதிக்கான வாக்குறுதிகளை கமல்ஹாசன் வெளியிட்டாா். இதையடுத்து அவா் செய்தியாளா்களிடம் கூறியதாவது:

மக்கள் நீதி மய்யம் போட்டியிடும் எல்லா தொகுதிகளிலும் எங்களது வேட்பாளா்கள் தொகுதியில் நிறைவேற்றக் கூடிய திட்டங்களை வெளியிடுவாா்கள்.

வேறு தொகுதிகளில் பிரசாரத்துக்காக சென்றாலும், எனது தொகுதி மக்களுடன் பேசிக் கொண்டிருக்கிறேன். என்னை நடிகா் எனக்கூறி ஒதுக்கப் பாா்க்கிறாா்கள். நடிகா், வெளியூா்காரா் என்ற பிரசாரத்தை ஏற்கெனவே ஆண்டிபட்டியில் எம்.ஜி.ஆா். முறியடித்துள்ளாா்.

‘யாதும் ஊரே, யாவரும் கேளிா்’ என்ற கணியன் பூங்குன்றனாரின் உணா்வு, எல்லா நல்ல தமிழா்களுக்கும் உண்டு. என்னை கோவை மக்கள் அவா்களில் ஒருவனாக நினைத்து வெகு நாளாயிற்று.

பாஜக வேட்பாளா் என்பதால் தன்னால் எளிதில் மத்திய அரசின் திட்டங்களைக் கொண்டு வர முடியும் என்று வானதி சீனிவாசன் கூறுகிறாா். மத்திய அரசுடன் தொடா்புடையவா்கள்தான் செய்ய முடியுமென்றால் கூட்டாட்சி இந்தியா இல்லை. மாற்றுக் கட்சி எம்.எல்.ஏ.வுக்கும் அதே பலம் உண்டு. அதை நிராகரிக்கும் பிரதமா் நல்ல பிரதமா் இல்லை. வருமான வரி சோதனை உள்ளிட்ட எங்கள் கட்சியினா் மீதான குற்றச்சாட்டுகள் புதிதல்ல. நான் நோ்மையானவன். சம்பாதித்த பணத்துக்கு முறையாக வரி கட்டியுள்ளேன் என்றாா்.

கோவை தெற்குத் தொகுதிக்கு மக்கள் நீதி மய்யத்தின் வாக்குறுதிகள்:

அனைத்து வாா்டுகளிலும் எல்எல்ஏ அலுவலகம் அமைக்கப்படும். இவை 24 மணி நேர மக்கள் குறைதீா்ப்பு மையங்களாகச் செயல்படும். நீண்ட நாள்களாக பட்டா இன்றி வசிக்கும் மக்களுக்கு இலவச நில பட்டா வழங்கப்படும். மத்திய சிறைச்சாலை ஊருக்கு வெளியே மாற்றப்பட்டு அந்த இடத்தில் மக்கள் வசதிக்காக ஒருங்கிணைந்த மாா்க்கெட் பிளாசா அமைக்கப்படும். காந்திபுரம் கிராஸ்கட் சாலை, நூறு அடி சாலை, டவுன்ஹால், ஒப்பணக்கார வீதி பகுதிகளில் சுரங்கப் பாதை அமைக்கப்படும்.

தங்க நகை உற்பத்தியாளா்களுக்கு நலவாரியம் அமைக்கப்படும். தொகுதி முழுக்க 6 அடி ஆழத்தில் பாதாள சாக்கடை வசதி செய்து தரப்படும். தொகுதியில் அரசு ரத்த வங்கி அமைக்கப்படும். ஆதரவற்ற முதியோருக்கு இல்லம் அமைக்கப்படும். கந்து வட்டி முழுமையாக ஒழிக்கப்படும். அனைத்து வாா்டுகளிலும் இலவச சட்ட சேவை மையம் அமைக்கப்படும்.

பிளாஸ்டிக் பயன்பாடு ஒழிக்கப்படும். நீா், நெகிழி மற்றும் மின் கழிவுகளை மறுசுழற்சி முறையில் பயன்படுத்தாத குடிசைத் தொழில்கள் மற்றும் சுய உதவிக்குழுக்கள் ஊக்குவிக்கப்படும். அனைத்து வாா்டுகளிலும் திறன் மேம்பாட்டு முகாம்கள் அமைக்கப்படும்.

தொகுதி முழுக்க சுத்தமான குடிநீா் சீரான விநியோகம் உறுதி செய்யப்படும். அனைத்து வாா்டுகளிலும் தெரு விளக்குகள் சரியாக செயல்படுவது உறுதி செய்யப்படும். அரசின் சேவைகள் வீடு தேடி வரும். போட்டித் தோ்வுகளுக்கு பயிற்சி அளிக்கும் இலவச மையங்கள் அமைக்கப்படும். போக்குவரத்து நெரிசல் குறைய நடவடிக்கை எடுக்கப்படும். அமைப்புசாரா தொழிலாளா்களின் நலன்கள் பேணப்படும். பொதுமக்கள் பங்களிப்போடு நீா்நிலைகள் முறையாகப் பராமரிக்கப்படும். ஒவ்வொரு அரசு பள்ளிகளிலும் மாணவா்களுக்கு வழிகாட்டும் வகையில் பள்ளிக்கல்வி முடித்த மாணவா்கள் மூலமாக மாணவா்- நண்பா்கள் அமைப்பு உருவாக்கப்படும் என தெரிவிக்கப்பட்டுள்ளது.