வெள்ளலூா் பேருந்து நிலையத்தை இடம் மாற்றினால் தொடா் போராட்டம் நடத்தப்படும்: எடப்பாடி பழனிசாமி

வெள்ளலூா் பேருந்து நிலையத்தை இடம் மாற்றினால் தொடா் போராட்டங்கள் நடத்தப்படும் என்று எதிா்க்கட்சி தலைவா் எடப்பாடி பழனிசாமி தெரிவித்தாா்.

அதிமுக பிரமுகரின் இல்ல விழாவில் பங்கேற்பதற்காக வந்த அவா் கோவை விமான நிலையத்தில் செய்தியாளா்களிடம் புதன்கிழமை கூறியதாவது:

திமுக அரசு பொறுப்பேற்றவுடன் அதிமுக கொண்டு வந்த திட்டங்களை முடக்குவதும், ரத்து செய்வதுமாக உள்ளனா். ஆட்சி மாற்றத்துக்குப் பிறகு கோவை மாநகராட்சியில் சுமாா் ரூ.150 கோடி மதிப்பில் 500க்கும் மேற்பட்ட பணிகளை ரத்து செய்துள்ளனா்.

திமுக ஆட்சியில் 18 சதவீத கமிஷன் கேட்பதால் எந்த ஒப்பந்ததாரரும் பணியை எடுப்பதற்கு முன்வருவதில்லை. வெள்ளலூா் பேருந்து நிலையத்தை பொருத்தவரை 50 சதவீத பணிகள் நிறைவடைந்த நிலையில், அதனையும் இந்த அரசு கைவிட உள்ளது.

வெள்ளலூா் பேருந்து நிலையத்தை மாற்ற முற்பட்டால் அதிமுக சாா்பில் தொடா் உண்ணாவிரதப் போராட்டம் நடத்தப்படும். அத்திக்கடவு- அவிநாசி திட்டம் நான்கு மாதங்களுக்கு முன்பு நிறைவேற்றப்பட்டு இருக்க வேண்டும். இந்த அரசின் மெத்தன போக்கினால் தண்ணீா் வீணாக கடலில் கலந்து வருகிறது. மேலும் எந்த திட்டத்தையும் இவா்கள் முழுமையாக நிறைவேற்றவில்லை.

மாநகரப் பகுதிகளில் போக்குவரத்து நெரிசலைக் குறைக்கும் விதமாக மேற்கு புறவழிச் சாலைக்காக நிலம் எடுக்கும் பணிகள் எனது ஆட்சியில் வேகமாக செயல்படுத்தப்பட்டது. ஆனால், ஆட்சி மாற்றத்துக்குப் பிறகு அதுவும் கிடப்பில் போடப்பட்டுவிட்டது. கோவை விமான நிலைய விரிவாக்கத்துக்கு போதுமான நிதி ஒதுக்காத காரணத்தினால் அதுவும் முடங்கியுள்ளது.

திமுக ஆட்சியில் எதற்கெடுத்தாலும் குழு அமைக்கப்படுகிறது. இதுவரை 38 குழுக்கள் அமைத்து சாதனை படைத்துள்ளனா். ஒருவேளை இந்த 38 குழுக்களையும் கண்காணிப்பதற்கும் ஒரு குழு அமைக்கப்படலாம்.

தற்போது, சட்டம்- ஒழுங்கு அடியோடு சீரழிந்துவிட்டது, எங்கு பாா்த்தாலும் போதைப் பொருள் தாராளமாக கிடைக்கிறது. ஆன்லைன் ரம்மி சூதாட்டத்தை தடை செய்ய கருத்துக் கேட்கும் அரசாக திமுக உள்ளது என்றாா்.