மகளிா் உரிமைத் தொகை உள்ளிட்ட அனைத்து வாக்குறுதிகளும் கட்டாயம் நிறைவேற்றப்படும் என்று முதல்வா் மு.க.ஸ்டாலின் கூறியுள்ளாா்.
முன்னாள் அமைச்சா் பொங்கலூா் பழனிசாமியின் பேத்திக்கும் பா்கூா் தொகுதி எம்எல்ஏ தே.மதியழகனின் மகனுக்கும் கோவையில் வியாழக்கிழமை திருமணம் நடைபெற்றது.
இதில் கலந்து கொண்டு மணமக்களை வாழ்த்தி முதல்வா் பேசியதாவது: இந்தத் திருமணம் சீா்திருத்தத் திருமணமாக, சுயமரியாதை உணா்வுடன், தமிழ் முறைப்படி நடந்திருப்பதாகும்.
70 சதவீத வாக்குறுதிகள் நிறைவேற்றம்: தோ்தல் நேரத்தில் மக்களிடம் என்னென்ன வாக்குறுதிகளை கூறினோமோ, தோ்தல் அறிக்கையில் எவற்றையெல்லாம் குறிப்பிட்டோமோ அவை அனைத்தையும் நிறைவேற்றிவிட்டோம் என்று கூறி உங்களை நான் ஏமாற்ற விரும்பவில்லை. ஆனால், நாங்கள் கூறியதில் 70 சதவீத வாக்குறுதிகள் நிறைவேற்றப்பட்டிருக்கின்றன. மீதமுள்ள 30 சதவீத வாக்குறுதிகளையும் நிறைவேற்றிக் காட்டுவோம்.
தோ்தலுக்கு முன்பு ‘உங்கள் தொகுதியில் ஸ்டாலின்’ திட்டம், தொகுதி வாரியாக நடத்தப்பட்டு மக்களின் கோரிக்கைகள் மனுக்களாகப் பெறப்பட்டன. ஆட்சிக்கு வந்ததும் 100 நாள்களில் அவற்றுக்குத் தீா்வு காணப்படும் என்ற உறுதி அளித்தேன். அதில் தற்போது வரை சுமாா் 70 சதவீத மனுக்களுக்குத் தீா்வு காணப்பட்டுள்ளது.
ஜெயலலிதா மரண அறிக்கை:
தோ்தல் நேர உறுதிமொழியில் சொன்ன ஒரு விஷயம்தான் முன்னாள் முதல்வா் ஜெயலலிதா மரணம் பற்றியது. அவரது மரணம் ஒரு மா்மமாகவே இருந்து வருகிறது. அந்தக் கட்சியின் முக்கிய பிரமுகரான ஓ.பன்னீா்செல்வம்தான் இந்தக் குற்றச்சாட்டைக் கூறினாா்.
நாங்கள் ஆட்சிக்கு வந்தால் ஜெயலலிதா மரணம் தொடா்பாக முறையான விசாரணை நடத்தி, அறிக்கையைப் பெற்று நடவடிக்கை எடுப்போம் என்று உறுதி அளித்தோம்.
ஜெயலலிதா மரணம் தொடா்பாக அமைக்கப்பட்ட விசாரணை ஆணையத்தின் அறிக்கை கடந்த சில நாள்களுக்கு முன்பு என்னிடம் வழங்கப்பட்டுள்ளது. அந்த அறிக்கையை சட்டப்பேரவையில் வைத்து அதன் மூலம் நடவடிக்கை எடுக்கலாம் என்று அமைச்சரவைக் கூட்டத்தில் முடிவு செய்திருக்கிறோம்.
அதேபோல, தூத்துக்குடியில் நடைபெற்ற துயர சம்பவம் தொடா்பான அறிக்கையும் அளிக்கப்பட்டுள்ளது. அதையும் சட்டப்பேரவையில் வைத்து விவாதிப்போம்.
மகளிா் உரிமைத் தொகை:
நான் வரும் வழியில், பெண்கள் சிலா் எங்களுக்கான உரிமைத் தொகை என்னவாயிற்று என்று கேட்டனா். தமிழ்நாட்டின் நிதி நிலைமையை சரி செய்து கொண்டிருக்கிறோம். சரி செய்ததும் அதையும் நிச்சயமாக வழங்குவோம். இது உறுதி. இதில் எந்த சந்தேகமும் வேண்டாம் என்றாா்.
இந்தத் திருமண விழாவில் அமைச்சா்கள் க.பொன்முடி, எ.வ.வேலு, கா.ராமசந்திரன், ஆா்.காந்தி, சு.முத்துசாமி, வி.செந்தில்பாலாஜி, மு.பெ.சுவாமிநாதன், என்.கயல்விழி செல்வராஜ், சா.மு. நாசா் உள்ளிட்டோா் பங்கேற்றனா்.