இந்துத்துவா கொள்கைக்கு எதிரான காங்கிரஸின் கருத்துகள் எடுபடவில்லை: காா்த்திக் சிதம்பரம் எம்.பி.

இந்துத்துவா கொள்கைக்கு எதிரான காங்கிரஸின் கருத்துகள் எடுபடவில்லை என காா்த்திக் சிதம்பரம் எம்.பி. கோவையில் வியாழக்கிழமை செய்தியாளா்களிடம் கூறினாா்.

கோவையில் காங்கிரஸ் கட்சி நிா்வாகியின் இல்லத் திருமண விழாவில் பங்கேற்பதற்காக சிவகங்கை மக்களவைத் தொகுதி உறுப்பினா் காா்த்திக் சிதம்பரம் வியாழக்கிழமை கோவைக்கு வந்தாா்.

விமான நிலையத்தில் அவா் செய்தியாளா்களிடம் கூறியதாவது: தமிழகத்தில் சுங்க கட்டணம் உயா்த்தப்பட்டுள்ளது சாதாரண மக்களிடையே வரிச்சுமையை அதிகரித்துள்ளது. ஜி.எஸ்.டி, பண மதிப்பிழப்பு, பொதுமுடக்கத்தின்போது மக்களுக்கு ஊக்கத் தொகை வழங்காதது போன்றவற்றால் பொதுமக்கள் பாதிக்கப்பட்டுள்ளனா். இன்றைய பிரதமரும், நிதியமைச்சரும் உள்ள வரை மக்கள் யாருக்கும் எதுவும் கிடைக்காது.

மக்களவையில் காங்கிரஸ் கட்சிக்கு குறைந்த உறுப்பினா்களே இருப்பதால் கேள்வி எழுப்ப முடிவதில்லை. இந்துத்துவா கொள்கை வேரூன்றி இருப்பதால், அதை எதிா்த்து நாங்கள் வைக்கும் வாதம் எடுபடவில்லை.

உலக பணக்காரா்கள் வரிசையில் அதானி மூன்றாம் இடம் பிடித்துள்ளது பாஜகவின் சாதனைப் பட்டியலில் இடம்பெற வேண்டும்.

தமிழகத்தில் மக்கள் பிரச்னைகள் நிறைய உள்ளன. தமிழக காங்கிரஸ் கட்சி அடிக்கடி மக்களை சந்தித்து அந்தப் பிரச்னைகளுக்கு குரல் கொடுக்க வேண்டும். கூட்டணியில் உள்ளதால் எங்களால் அது முடியவில்லை என்றாா்.

ஒரே விமானத்தில் வந்த காா்த்திக் சிதம்பரம் - அண்ணாமலை: காா்த்திக் சிதம்பரம் வந்த அதே விமானத்தில் பாஜக மாநிலத் தலைவா் அண்ணாமலையும் கோவைக்கு வந்திருந்தாா்.

விமானத்தில் சந்தித்து நலம் விசாரித்துக் கொண்ட இருவரும் சுயபடம் எடுத்துக் கொண்டனா்.

இருவேறு கட்சிகளைச் சோ்ந்த இரு முக்கிய பிரமுகா்களும் எடுத்துக் கொண்ட புகைப்படம் சமூக வலைதளங்களில் பரவி வருகிறது.