கணபதி முதல் சரவணம்பட்டி வரை சாலை விரிவாக்கப் பணி

கணபதி மோா் மாா்க்கெட் பகுதியில் சாலை மேம்பாட்டுப் பணி, சத்தியமங்கலம் சாலை குரும்பபாளையம் முதல் தமிழ்நாடு கா்நாடக எல்லை வரை நான்கு வழிச்சாலையை, ஆறு வழிச்சாலையாக அகலப்படுத்தும் பணி, கோவை புறவழிச் சாலையை நான்கு வழிச்சாலையாக அகலப்படுத்தும் பணி ஆகிய பணிகள் தொடா்பான கூட்டம் மாவட்ட ஆட்சியா் கிராந்திகுமாா் பாடி தலைமையில் செவ்வாய்க்கிழமை நடைபெற்றது.

கோவை மக்களவை உறுப்பினா் கணபதி ப.ராஜ்குமாா் முன்னிலை வகித்தாா். இதுதொடா்பாக, ஆட்சியா் கிராந்திகுமாா் பாடி செய்தியாளா்களிடம் கூறியதாவது:

கணபதி மோா் மாா்க்கெட் சந்திப்பில் உள்ள விபத்து பகுதியை அகற்றுவதற்கான மேம்பாட்டுப் பணி மேற்கொள்ள அனுமதி வழங்கப்பட்டுள்ளது. இத்திட்டத்தின் கீழ் கணபதி டெக்ஸ்டூல் பாலம் முதல் சரவணம்பட்டி புரோஸன் மால் வரை நான்கு வழிப்பாதையாகவும், ஆறு வழிப்பாதையாகவும் அகலப்படுத்தப்படவுள்ளது.

சத்தியமங்கலம் சாலை (தேசிய நெடுஞ்சாலை 648) குரும்பபாளையம் முதல் தமிழ்நாடு கா்நாடக எல்லை வரை நான்கு வழிச் சாலையை ஆறு வழிச்சாலையாக அகலப்படுத்த விரிவான திட்ட அறிக்கை தயாா் செய்யும் பணிக்கு நில எடுப்பு செய்ய மத்திய சாலைப் போக்குவரத்து அமைச்சகத்தின் மூலம் ரூ.639.18 கோடி நிதி ஒதுக்கப்பட்டுள்ளது.

இப்பணிக்கு கோவை, திருப்பூா், ஈரோடு ஆகிய மாவட்டங்களில் 31 கிராமங்களில் 29,141 ஹெக்டோ் நில எடுப்பு செய்யப்படவுள்ளது. கோவை புறவழிச்சாலை (எல் அண்ட் டி பைபாஸ்) நீளம் 28 கிலோ மீட்டா் ஆகும். இச்சாலை தற்போது 10 மீட்டா் அகலத்தில் உள்ளது. இச்சாலையை நான்கு வழிச்சாலையாக அகலப்படுத்த விரிவான திட்ட அறிக்கை தயாா் செய்யும் பணி தற்போது நடைபெற்று வருகிறது.

இச்சாலைகள் பணிகள் தொடா்பாக சம்மந்தப்பட்ட துறை அலுவலா்களுடனான ஆலோசனைக் கூட்டம் நடைபெற்றது. மேலும், சக்தி சாலையில் ஏற்படும் போக்குவரத்து நெரிசலை தவிா்க்க மேற்கொள்ளப்பட வேண்டிய பணிகள் குறித்தும் சம்மந்தப்பட்ட துறை அலுவலா்களுடன் ஆலோசனை மேற்கொள்ளப்பட்டது.

நெடுஞ்சாலைத் துறையின் சாா்பில் மாவட்டத்தில் மேற்கொள்ளப்பட்டு வரும் சாலைப் பணிகள் மற்றும் மேம்பாலப் பணிகளை விரைந்து முடிக்க அலுவலா்களுக்கு அறிவுறுத்தப்பட்டது என்றாா்.

முன்னதாக, கணபதி டெக்ஸ்டூல் பாலம், மோா் மாா்க்கெட், 3ஆம் எண் பேருந்து நிலையம், சூா்யா மருத்துவமனை ஆகிய இடங்களில் சாலை விரிவாக்கப் பணி தொடா்பாக மாவட்ட ஆட்சியா் கிராந்திகுமாா் பாடி, கணபதி ப.ராஜ்குமாா் எம்.பி., மாநகராட்சி ஆணையா் மா.சிவகுரு பிரபாகரன் ஆகியோா் ஆய்வு மேற்கொண்டனா்.