கடன் தருவதாக ரூ.80 லட்சம் மோசடி: குன்னூா் காவல் ஆய்வாளா் உள்பட 4 போ் மீது புகாா்

உழவா் உற்பத்தியாளா் நிறுவனத்துக்கு கடன் தருவதாகக் கூறி ரூ.80 லட்சம் மோசடி செய்ததாக குன்னூா் காவல் ஆய்வாளா் உள்பட 4 போ் மீது கோவை மாவட்ட காவல் கண்காணிப்பாளா் அலுவலகத்தில் சனிக்கிழமை புகாா் அளிக்கப்பட்டது.

சேலம் மாவட்டம், மேட்டூா் அருகேயுள்ள தெற்கத்தியானூா் பகுதியைச் சோ்ந்த கி.கோவிந்தராஜ் என்பவா், விவசாயிகளுடன் மாவட்ட கண்காணிப்பாளா் அலுவலகத்தில் சனிக்கிழமை அளித்த மனுவில் கூறியிருப்பதாவது: நான் வள்ளலாா் உழவா் உற்பத்தியாளா் நிறுவனம் என்ற பெயரில் விவசாயிகளுக்கான பயிா் உற்பத்தி, விவசாயத் தொழில்நுட்பங்கள் குறித்த பயிற்சியளிக்கும் விவசாய சங்கத்தை நடத்தி வருகிறேன்.

இந்நிலையில், சுனில்குமாா், சங்கா் ஆகியோா் எங்கள் அமைப்பின் வங்கி பரிவா்த்தனைகளைத் தெரிந்து கொண்டு, தங்களது நிறுவனம் மூலம் ரூ.20 கோடி மானியத்தில் கடன் வழங்க உள்ளதாகவும், கோவை, சாய்பாபா காலனியில் உள்ள நிறுவனத்துக்கு வருமாறும் கூறினா்.

இதையடுத்து, உழவா் உற்பத்தியாளா் நிறுவனத்தைச் சோ்ந்த கந்தசாமி, தினேஷ்குமாா் ஆகியோருடன் நான் சென்றபோது, மானியத்துடன் ரூ.20 கோடி கடன் வழங்க முன்வைப்புத் தொகையாக ரூ.80 லட்சத்தை செலுத்த வேண்டும் என்றனா்.

இதையடுத்து, ரூ.80 லட்சத்தைக் கொடுத்தோம்.

பின்னா், நீலகிரி மாவட்டம், கூடலூருக்கு வந்து ரூ.10 கோடியை ரொக்கமாகவும், ரூ.10 கோடியை காசோலையாகவும் பெற்றுச் செல்லுமாறு கூறினா்.

கூடலூா் பேருந்து நிலையத்துக்கு கடந்த மே 13 -ஆம் தேதி சென்றோம். அங்கு காரில் வந்த மணி என்பவா் ரூ.10 கோடி ரொக்கம், ரூ.10 கோடிக்கான காசோலையைக் காண்பித்தாா். பின்னா், அந்த காரிலேயே சேலம் செல்ல ஏறினோம்.

செல்லும் வழியில் குன்னூா் காவல் ஆய்வாளா் சதீஷ், அவருடன் இருந்த காவலா் சிவகுமாா் ஆகியோா் நாங்கள் இருந்த காரை மறித்து எங்களை ஜீப்பில் ஏற்றிக் கொண்டனா். காவல் நிலையம் சென்றதும் பணம் தொடா்பாக எங்களிடம் சதீஷ் விசாரித்தாா்.

பிறகு சுனில்குமாரை கைப்பேசியில் தொடா்பு கொண்ட சதீஷ், அவரை காவல் நிலையத்துக்கு அழைத்தாா். அங்கு வந்த சுனில்குமாா், சதீஷ் ஆகியோா் தனிமையில் பேசினா். பின்னா் அவருடன் இருந்த காவலா், எங்களை குன்னூா் பேருந்து நிலையத்தில் இறக்கிவிட்டாா்.

பிறகுதான், காவல் ஆய்வாளா் சதீஷ், சுனில்குமாா், சங்கா், காவலா் சிவகுமாா் ஆகியோா் கூட்டு சோ்ந்து ரூ.20 கோடி மானியத்தில் கடன் தருவதாகக் கூறி, முன்பணமாக ரூ.80 லட்சத்தைப் பெற்று மோசடி செய்தது தெரியவந்தது.

எனவே, இது தொடா்பாக உரிய விசாரணை நடத்தி பணத்தை மீட்டுத் தர வேண்டும் எனத் தெரிவிக்கப்பட்டுள்ளது.