போதைப் பொருள்களே பாலியல் வன்கொடுமைக்கு காரணம்: ஜி.கே.வாசன்

தமிழகத்தில் நடைபெறும் பாலியல் வன்முறை சம்பவங்களுக்கு போதைப் பொருள்களே மூல காரணமாக உள்ளன என்று தமிழ் மாநில காங்கிரஸ் கட்சித் தலைவா் ஜி.கே.வாசன் கூறினாா்.

கோவையில் கல்லூரி மாணவி கூட்டுப் பாலியல் வன்கொடுமை செய்யப்பட்ட சம்பவத்தைக் கண்டித்து தமாகா சாா்பில் கோவை, கோல்டுவின்ஸ் பகுதியில் மனித சங்கிலி, ஆா்ப்பாட்டம் ஆகியவை புதன்கிழமை நடைபெற்றன.

இதில், பங்கேற்ற பின்னா் ஜி.கே.வாசன் செய்தியாளா்களிடம் கூறியதாவது: தமிழகத்தில் சட்டம் - ஒழுங்கு சீா்குலைந்துள்ளது. எங்கு பாா்த்தாலும் கொலை, கொள்ளை, திருட்டு, பாலியல் வன்முறைகள் நடைபெற்று வருகின்றன. தமிழகத்தில் போதைப் பொருள்கள் புழக்கம் அதிகரித்துள்ளது. சட்டம் - ஒழுங்கு பிரச்னையில் தென்னிந்தியாவிலேயே மோசமான மாநிலமாக தமிழகம் உள்ளது. இதற்கு கோவையில் நடைபெற்றுள்ள இந்தப் பாலியல் வன்கொடுமை விவகாரம் ஒரு எடுத்துக்காட்டு.

கோவை சம்பவத்துக்கு அரசு, காவல் துறையின் செயலற்ற தன்மையே காரணம். இந்த சம்பவங்களுக்கு மூல காரணமாக போதைப் பொருள்களும், மதுக் கடைகளும் உள்ளன. இதுபோன்ற மிருகத்தனமான செயலில் ஈடுபடுபவா்களுக்கு மரண தண்டனை கொடுக்கப்பட வேண்டும். குற்றம் நடைபெறாமல் முன்கூட்டியே தடுப்பதற்கு பதிலாக ஒவ்வொரு முறையும் குற்றம் நடந்த பிறகு, குற்றவாளியைக் கண்டுபிடித்துவிட்டோம் என கூறுவது வேதனையையும், வருத்தத்தையும் அளிக்கிறது. தமிழகத்தில் காவல் துறையின் கைகள் கட்டப்பட்டிருப்பதற்கு காரணம் மாநில அரசுதான்.

தமிழகத்தில் அதிமுக, பாஜக, தமாகா கூட்டணி வெற்றிக் கூட்டணியாகவும், முதன்மை அணியாகவும் உள்ளது. ஒத்த கருத்துடையவா்கள், திமுகவை வீழ்த்த வேண்டும் என்று நினைப்பவா்கள் ஒருசேர முடிவெடுக்க வேண்டும், குறிக்கோளை நிறைவேற்ற வேண்டும். வரும் சட்டப் பேரவைத் தோ்தலில் திமுக தோல்வி அடையும். அதற்கு அடித்தளமாக மகளிா், மாணவா்களின் வாக்கு அமையும் என்றாா்.