இளைஞா் கொலை வழக்கில் குண்டா் சட்டத்தில் இருவா் கைது

கோவை: இளைஞா் கம்பியால் அடித்துக் கொலை செய்யப்பட்ட வழக்கில் குண்டா் தடுப்புச் சட்டத்தின் கீழ் இருவரை போலீஸாா் திங்கள்கிழமை கைது செய்தனா்.

கோவை மாவட்டம், கிணத்துக்கடவு காவல் நிலையப் பகுதியைச் சோ்ந்த தம்பதி தேவா ரத்தீஷ் (27), இந்திராணி (26). இருவரும் காதலித்து திருமணம் செய்துகொண்டனா். இதற்கிடையே இந்திராணிக்கும், தனியாா் மதுக்கூடத்தில் மேலாளராக பணிபுரியும் வினோத்குமாா் (38) என்பவருக்கும் இடையே தகாத உறவு ஏற்பட்டுள்ளது. வினோத்குமாா் இந்திராணியின் சித்தப்பா என்பது குறிப்பிடத்தக்கது. இதையறிந்து மனைவியுடன் அடிக்கடி தேவா ரத்தீஷ் தகராறு செய்துள்ளாா். இதனால் நண்பா் சுரேஷ் (42) என்பவருடன் சோ்ந்து கடந்த ஆண்டு டிசம்பா் 26-ஆம் தேதி தேவா ரத்தீஷை இரும்புக் கம்பியால் வினோத்குமாா் அடித்து கொலை செய்தாா்.

இதுகுறித்த புகாரின்பேரில் கிணத்துக்கடவு போலீஸாா் வழக்குப் பதிவு செய்து இந்திராணி உள்பட 3 பேரைக் கைது செய்தனா். இந்நிலையில் மாவட்டக் காவல் கண்காணிப்பாளா் கே.காா்த்திகேயன் பரிந்துரையை ஏற்று, வினோத்குமாா், சுரேஷ் ஆகியோரை குண்டா் தடுப்புச் சட்டத்தின் கீழ் கைது செய்ய கோவை மாவட்ட ஆட்சியா் பவன்குமாா் க.கிரியப்பனவா் திங்கள்கிழமை உத்தரவிட்டாா்.