ஈரோடு மாவட்டம், சென்னிமலை மற்றும் திருப்பூா் மாவட்டம், பல்லடத்தில் திமுக மகளிரணி செயலாளரும், எம்.பி.யுமான கனிமொழி ஞாயிற்றுக்கிழமை பிரசாரம் மேற்கொண்டாா்.
சென்னிமலை, குமரன் சதுக்கத்தில் உள்ள சுதந்திரப் போராட்ட தியாகி கொடிகாத்த குமரனின் படத்துக்கு மாலை அணிவித்து தோ்தல் பிரசாரத்தில் அவா் பேசியதாவது:
மத்திய அரசு நிறைவேற்றியுள்ள 3 வேளாண் சட்டங்கள் விவசாயிகளை பாதித்துள்ளது. இந்தச் சட்டத்தால் உணவுப் பாதுகாப்பு இல்லை. நியாய விலைக் கடைகளில் அடிப்படை பொருள்களைப் பாதுகாக்கப்பட்ட பட்டியலில் இருந்து நீக்கிவிட்டாா்கள்.
தொழிற்சாலைகள் மூடப்பட்டதால் பல லட்சக்கணக்கான தொழிலாளா்கள் வேலை இழந்து தவிக்கின்றனா். மத்திய அரசு கொண்டு வந்துள்ள பண மதிப்பிழப்பு மற்றும் ஜி.எஸ்.டி.யால் தொழில்கள் பெருமளவில் பாதிக்கப்பட்டுள்ளன. தேசிய அளவில் 25 சதவீதம் பேருக்கு வேலை இல்லை. தமிழகத்தில் 50 சதவீதம் பேருக்கு வேலை இல்லை.
மேலும், கைத்தறி மற்றும் விசைத்தறி நெசவுத் தொழில் பெருமளவில் பாதிக்கப்பட்டுள்ளது. நெசவாளா்களின் வாழ்க்கை தற்போது கேள்விக்குறியாக உள்ளது.
நெசவுத் தொழிலை விட்டு பலா் வேறு வேலைக்கு சென்றுவிட்டனா். தமிழகத்தில் உள்ள தொழிலாளா்கள் தற்போது மற்ற மாநிலங்களுக்கு வேலைத் தேடி சென்றுவிட்டனா். திமுக ஆட்சிக்கு வந்தவுடன் நெசவாளா் பிரச்னைக்குத் தீா்வு காணப்படும் என்றாா்.
பின்னா், சென்னிமலையில் பொதுமக்களிடம் குறைகளைக் கேட்டாா். அதைத் தொடா்ந்து அறச்சலூா் சாலையில் உள்ள தனியாா் திருமண மண்டபத்தில் நடைபெற்ற பெண்கள் கருத்தரங்கில் பங்கேற்றாா்.
திருப்பூா் கிழக்கு மாவட்டப் பொறுப்பாளா் மு.பெ.சாமிநாதன், திருப்பூா் வடக்கு மாவட்டச் செயலாளா் இல. பத்மநாபன், சென்னிமலை தெற்கு ஒன்றியப் பொறுப்பாளா் எஸ்.ஆா்.எஸ்.செல்வம் மற்றும் கட்சி நிா்வாகிகள் பலா் கலந்து கொண்டனா்.
பல்லடத்தில்: பல்லடம், அருள்புரத்தில் உள்ள தனியாா் திருமண மண்டபத்தில் திமுக சாா்பில் 1,000 மகளிா் பங்கேற்ற கலந்துரையாடல் கூட்டம் ஞாயிற்றுக்கிழமை நடைபெற்றது. மு.பெ.சாமிநாதன் தலைமை வகித்தாா். கணபதிபாளையம் ஊராட்சி முன்னாள் தலைவா் என்.சோமசுந்தரம் உள்ளிட்டோா் முன்னிலை வகித்தனா்.
இதில் பங்கேற்ற பின்னா் செய்தியாளா்களிடம் கனிமொழி கூறுகையில், ‘வரும் தோ்தல் குறித்து அதிமுகவுக்கு தோல்வி பயம் ஏற்பட்டுள்ளது. இதனால்தான் முன்னாள் மத்திய அமைச்சா் ஆ.ராசா 2 ஜி ஊழல் முறைகேடு செய்தாா் என முதல்வா் எடப்பாடி பழனிசாமி தொடா்ந்து பொய் பிரசாரம் செய்து வருகிறாா். ரஜினி அரசியலுக்கு வருவதை திமுக எதிா்க்கவில்லை. ஜனநாயக நாட்டில் யாா் வேண்டுமானாலும் கட்சி ஆரம்பிக்கலாம்’ என்றாா்.