பெருந்துறையில் 916 மாணவ மாணவிகளுக்கு விலையில்லா மிதிவண்டி வழங்கும் விழா

பெருந்துறையில் 916 அரசுப் பள்ளி மாணவ, மாணவிகளுக்கு அரசின் விலையில்லா மிதிவண்டிகளை அத்தொகுதி சட்டப்பேரவை உறுப்பினா் என்.டி. தோப்பு வெங்கடாசலம் வழங்கினாா்.

பெருந்துறை ஒன்றியத்துக்கு உள்பட்ட அரசு ஆண்கள் மேல்நிலைப் பள்ளி, பெண்கள் மேல்நிலைப்பள்ளி, சீனாபுரம், விஜயமங்கலம், ஈங்கூா் மேல்நிலைப் பள்ளிகளில் பயிலும் மாணவ, மாணவிகளுக்கு விலையில்லா மிதிவண்டிகள் வழங்கும் விழா சனிக்கிழமை நடைபெற்றது.

பெருந்துறை அரசு ஆண்கள் மேல்நிலைப் பள்ளியில் சனிக்கிழமை நடைபெற்ற விழாவுக்கு பெருந்துறை மாவட்டக் கல்வி அலுவலா் த.ராமன் தலைமை வகித்தாா். விழாவில், சிறப்பு அழைப்பாளராக, பெருந்துறை சட்டப் பேரவை உறுப்பினா் என்.டி. தோப்பு வெங்கடாசலம் கலந்து கொண்டு 916 மாணவ மாணவிகளுக்கு விலையில்லா மிதிவண்டிகளை வழங்கிப் பேசினாா்.

இதில், பெருந்துறை ஒன்றிய அதிமுக செயலாளா் விஜயன், ஈரோடு மாவட்ட ஊராட்சிக் குழு உறுப்பினா் ஏ.வி.பாலகிருஷ்ணன், பெருந்துறை ஒன்றியக் குழுத் தலைவா் ஜெ.சாந்தி, ஒன்றியக் குழு துணைத் தலைவா் எம்.ஆா்.உமாமகேஸ்வரன், பெருந்துறை அரசு ஆண்கள் மேல்நிலைப் பள்ளித் தலைவா் துளசிமணி, துணைத் தலைவா் கே.ஆா்.சின்னசாமி மற்றும் ஆசிரியா், ஆசிரியைகள் கலந்து கொண்டனா்.