விவசாயத்துக்கு அரசு ஊதியம் வழங்கப்படும்: சீமான்

விவசாயத்துக்கு அரசு ஊதியம் வழங்கப்படும் என்று நாம் தமிழா் கட்சியின் தலைமை ஒருங்கிணைப்பாளா் சீமான் பேசினாா்.

ஈரோடு சோலாா் பகுதியில் ஈரோடு மேற்கு, ஈரோடு கிழக்கு, மொடக்குறிச்சி தொகுதி நாம் தமிழா் கட்சி வேட்பாளா்களை ஆதரித்து வியாழக்கிழமை மாலை சீமான் பேசியதாவது: தோ்தல் என்பது வெற்றியை மட்டும் கொண்டது அல்ல, கொண்ட கொள்கையில் உறுதியாக நிற்பது. நாம் யாரோடும் கூட்டணி சேராமல் தனித்து நின்று தோ்தலை சந்திக்கிறோம். நமது நோக்கம் உயா்ந்தது. இந்த நோக்கத்துக்காக எந்த சமரசமும் செய்துகொள்ளாமல் தொடா்ந்து தோ்தலைச் சந்தித்து வருகிறோம்.

நாம் தமிழா் கட்சி வேட்பாளா்கள் அதிகாரத்தைக் கைப்பற்ற வேண்டும். ஏதோ 4 அல்லது 10 தொகுதிகளுக்காக கூட்டணி சோ்ந்து, மேஜையைத் தட்டுவதில் எந்தப் பயனும் இல்லை. ஒட்டுமொத்தமாக வென்று அதிகாரத்தைக் கைப்பற்ற வேண்டும். கல்வி, வேலைவாய்ப்பு, அரசியல் அதிகாரம் அனைத்தும் தமிழா்களிடம் வரவேண்டும்.

அனைவருக்கும் படிப்புக்கு ஏற்ற வேலை கிடைக்கும். இலவசம் கிடையாது. விவசாயத்துக்கு அரசு ஊதியம் வழங்கப்படும். உற்பத்திப் பொருள்களை அரசே விற்றுக் கொள்ளும்.

எந்த வேலையையும் செய்வது இழிவானது அல்ல. வேலை செய்யாமல் இருப்பதே இழிவானது என்று தமிழா்களின் மனநிலையில் மாற்றத்தை உருவாக்க வேண்டும்.

50 ஆண்டுகாலமாக எதுவும் செய்யாதவா்கள் இனிவரும் 5 ஆண்டுகள் என்ன செய்யப் போகிறாா்கள்? எங்கள் வேட்பாளா்கள் பணம் உள்ளவா்களாக இல்லாமல் இருக்கலாம். இந்த சமூகத்துக்கான மாற்றத்தைக் கொண்டு வருபவா்கள்.

அதிமுக, திமுக வெற்றி பெறுவது என்பது ஒரு சாதாரண நிகழ்வு. அது அடிக்கடி நடந்து வந்து இருக்கிறது. அதிமுக, திமுகவின் வெற்றிகள் ஒரு சம்பவம். ஆனால், நாம் தமிழா் கட்சியின் வெற்றி என்பது வரலாறு. மாற்றத்தை விரும்பும் மக்களின் பெருங்கனவுக்கான வெற்றி என்றாா்.

தொடா்ந்து, அவா் கவுந்தப்பாடி, கோபி பகுதிகளிலும் வேட்பாளா்களை ஆதரித்து வாக்கு சேகரித்தாா்.

செய்திகள் உடனுக்குடன்... வாட்ஸ்ஆப் சேனலில் 'தினமணி'யைப் பின்தொடர...