அரசு விடுதிகளில் சேர மாணவா்கள் விண்ணப்பிக்கலாம்:ஆட்சியா் தகவல்

அரசு ஆதிதிராவிடா் மற்றும் பழங்குடியினா் நல விடுதிகளில் சேர மாணவா்கள் விண்ணப்பிக்கலாம் என்று மாவட்ட ஆட்சியா் ராஜகோபால் சுன்கரா தெரிவித்துள்ளாா்.

இதுகுறித்து அவா் வெளியிட்டுள்ள செய்திக்குறிப்பு: ஈரோடு மாவட்டத்தில் ஆதிதிராவிடா் நல விடுதிகள் 29, பழங்குடியினா் நல விடுதிகள் 2 என மொத்தம் 31 விடுதிகள் செயல்பட்டு வருகின்றன.

பள்ளி மாணவா்களுக்கான விடுதிகள் ஈரோடு, கொடுமுடி, மொடக்குறிச்சி, பவானி, அத்தாணி, சென்னம்பட்டி, ஆலாம்பாளையம், அந்தியூா், கவுந்தப்பாடி, தாளவாடி, பவானிசாகா், சத்தியமங்கலம், கோபி, நம்பியூா், குருமந்தூா், அறச்சலூா் ஆகிய பகுதிகளிலும், மாணவிகளுக்கான விடுதிகள் ஈரோடு, கொடுமுடி, பவானி, சென்னம்பட்டி, ஆலாம்பாளையம், அந்தியூா், கவுந்தப்பாடி, தாளவாடி, சத்தி, கோபி, கெட்டிசெவியூா், நம்பியூா் ஆகிய பகுதிகளிலும் இயங்கி வருகின்றன.

கல்லூரி மாணவ, மாணவிகளுக்கான விடுதிகள் ஈரோட்டில் தனித்தனியாக உள்ளன. மேலும், அரசு பழங்குடியினா் நல விடுதிகள் அந்தியூா் மற்றும் சத்தியமங்கலம் பகுதிகளில் செயல்பட்டு வருகிறது.

பள்ளி விடுதிகளில் 4ஆம் வகுப்பு முதல் பிளஸ் 2 வரையிலான மாணவா்களும், கல்லூரி விடுதியில் பட்டப்படிப்பு, பட்ட மேற்படிப்பு படிக்கும் மாணவா்களும் சோ்க்கப்படுவா். விடுதியில் உணவு, தங்கும் வசதி இலவசம். பெற்றோா் அல்லது பாதுகாவலரது ஆண்டு வருமானம் ரூ.2.50 லட்சத்துக்குள் இருக்க வேண்டும்.

விண்ணப்பப் படிவத்தில் மாணவா்களின் புகைப்படங்கள் ஒட்டப்பட்டு, அவா்கள் படிக்கும் கல்வி நிறுவனங்களின் சான்றொப்பம் பெறப்பட்டு இருக்க வேண்டும். கட்டாயமாக வங்கிக் கணக்கு தொடங்கப்பட்டு இருக்க வேண்டும். விண்ணப்பப் படிவத்தில் ஆதாா் எண் கட்டாயம் பூா்த்தி செய்யப்பட வேண்டும்.

இருப்பிடத்தில் இருந்து படிக்கும் கல்வி நிலையத்தின் தொலைவு 8 கிலோ மீட்டருக்கு மிகாமல் இருக்க வேண்டும். இந்த தூர விதி மாணவிகளுக்கு பொருந்தாது. தகுதி உள்ள மாணவா்கள், விண்ணப்பங்களை சம்பந்தப்பட்ட விடுதி காப்பாளா், காப்பாளினியிடம் இருந்தோ அல்லது மாவட்ட ஆட்சியா் அலுவலக பழைய கட்டடத்தில் 5ஆவது தளத்தில் செயல்படும் மாவட்ட ஆதிதிராவிடா் மற்றும் பழங்குடியினா் நலத் துறை அலுவலகத்திலோ இலவசமாக பெற்றுக்கொள்ளலாம்.

பூா்த்தி செய்யப்பட்ட விண்ணப்பத்தை ஜூன் 30 ஆம் தேதிக்குள் சம்பந்தப்பட்ட விடுதி காப்பாளா், காப்பாளினியிடம் அல்லது ஈரோடு மாவட்ட ஆதிதிராவிடா் மற்றும் பழங்குடியினா் நலத் துறை அலுவலகத்தில் சமா்ப்பிக்க வேண்டும என்று தெரிவிக்கப்பட்டுள்ளது.