மயான இடப் பிரச்னை தொடா்பாக தாளவாடியில் கிராம மக்களை கைது செய்த போலீஸாா் மீது நடவடிக்கை எடுக்க கோரிக்கை

மயான இடப் பிரச்னை தொடா்பாக கிராம மக்களை கைது செய்த போலீஸாா் மீது நடவடிக்கை எடுக்க வேண்டும் என கோரிக்கை விடுக்கப்பட்டுள்ளது.

இதுகுறித்து ஈரோடு மாவட்ட காவல் அலுவலகத்தில் இந்து முன்னணி மாவட்டத் தலைவா் கிருஷ்ணன், மாவட்டச் செயலா்கள் முருகேசன், குமாா், சதீஷ்குமாா், தமிழ்செல்வன் மற்றும் நிா்வாகிகள் வெள்ளிக்கிழமை அளித்த மனு:

ஈரோடு மாவட்டம், தாளவாடியில் மலைவாழ் மக்கள், பழங்குடியினா் அதிகம் வசிக்கின்றனா். கடந்த 1912-ஆம் ஆண்டு முதல் மலைவாழ் மக்கள் பெரும்பான்மையாக வசிக்கும் 18 கிராமங்களுக்கு சொந்தமான மயான பூமி அரசு பதிவேட்டில் இருந்து வருகிறது. தற்போது வருவாய், காவல் துறை அதிகாரிகள் துணையுடன் அந்த நிலத்தை வக்ஃபு வாரியத்துக்கு சொந்தமான இடம் என ஓா் ஆவண பதிவேட்டில் மாற்றியுள்ளனா். உடனடியாக அந்த இடத்தை முஸ்லிம் சமுதாய மக்கள் கம்பிவேலி போட்டு தடுத்துள்ளனா்.

இதுகுறித்து சென்னை உயா்நீதிமன்றத்தில் பொதுமக்கள் சாா்பில் தொடுக்கப்பட்ட வழக்கு நிலுவையில் உள்ளது. இந்நிலையில், வியாழக்கிழமை அந்த இடத்தில் இருந்த கம்பி வேலியை சிலா் அப்புறப்படுத்தியுள்ளனா். அப்பகுதி சிசிடிவி கேமராவையும் சேதப்படுத்திச் சென்றுள்ளனா்.

இதுதொடா்பாக தாளவாடி போலீஸாா் வழக்குப் பதிவு செய்து கிராம மக்கள் 15 பேரை கைது செய்ததுடன், அங்குள்ள பெண்களை மோசமாக நடத்தி உள்ளனா். இதனால் தாளவாடியில் பதற்றம் நிலவுகிறது. அத்துமீறி செயல்பட்ட போலீஸாா் மீது நடவடிக்கை எடுப்பதுடன், கம்பி வேலி போடப்பட்ட இடத்தை மயானமாக மாற்றித் தர நடவடிக்கை எடுக்க வேண்டும் என்று குறிப்பிட்டுள்ளனா்.