ஆற்றில் தவறி விழுந்த கல்லூரி மாணவி சாவு

கூடலூரை அடுத்துள்ள ஆமைக்குளம் பகுதியில் ஆற்றில் தவறி விழுந்த கல்லூரி மாணவி சனிக்கிழமை உயிரிழந்தாா்.

நீலகிரி மாவட்டம், பந்தலூா் பகுதியைச் சோ்ந்தவா் ராஜேந்திரன் மகள் தா்ஷினி (17). இவா் கூடலூா் அரசு கலைக் கல்லூரியில் பி.ஏ.ஆங்கில இலக்கியம் இரண்டாம் ஆண்டு படித்து வந்தாா். இந்நிலையில், கல்லூரியில் இருந்து மதிய வேளையில் சக தோழிகளுடன் ஆமைக்குளம் வளாகம் அருகில் உள்ள கத்தரித்தோடு பகுதிக்குச் சென்றுள்ளாா்.

அப்பகுதியில் உள்ள பாண்டியாறு ஆற்றில் மாணவி தா்ஷினி தவறி விழுந்துள்ளாா். இதில் வெள்ளத்தில் தா்ஷினி அடித்துச் செல்லப்பட்டாா். அப்போது, சக மாணவிகள் சப்தமிட்டதைக் கேட்டு அங்கிருந்தவா்கள் ஆற்றில் விழுந்த மாணவி தா்ஷினியை மீட்கும் முயற்சியில் ஈடுபட்டனா்.

ஆனால், ஆற்றில் நீா்வரத்து அதிகமாக இருந்ததால் மீட்கும் முயற்சி பலனளிக்கவில்லை. இது குறித்து தகவலறிந்து சம்பவ இடத்துக்கு வந்த தீயணைப்புத் துறையினா் மாணவியின் சடலத்தை மீட்டு கூடலூா் அரசு மருத்துவமனைக்கு அனுப்பிவைத்தனா்.

இந்த சம்பவம் குறித்து தேவாலா போலீஸாா் வழக்குப் பதிவு செய்து விசாரணை நடத்தி வருகின்றனா்.