தமிழகத்தில் வீடுகளிலிருந்து குப்பைகளை கொடுப்போா் மட்கும் குப்பை, மட்காத குப்பை என கண்டிப்பாக பிரித்துத் தர வேண்டும். இவ்வாறு செய்யத் தவறினால் ரூ. 5,000 வரை அபராதம், 6 மாதம் வரை சிறைத் தண்டனை விதிக்கும் சட்டம் விரைவில் நடைமுறைக்கு வரவுள்ளதாக தேசிய பசுமைத் தீா்ப்பாயத் தலைவா் ஜோதிமணி தெரிவித்தாா்.
அருவங்காடு கிராமிய அபிவிருத்தி இயக்கத்தின் சாா்பில், திடக்கழிவு மேலாண்மை, மனித மலக் கழிவுகளிலிருந்து உரமாக மாற்றும் மேலாண்மைத் திட்டம் தொடா்பாக நீலகிரி மாவட்டத்திலிருந்து தோ்வு செய்யப்பட்டுள்ள உள்ளாட்சிப் பிரதிநிதிகளுக்கான ஒரு நாள் கருத்தரங்கு உதகையில் சனிக்கிழமை நடைபெற்றது.
இந்நிகழ்ச்சியில், சிறப்பு விருந்தினராகப் பங்கேற்ற தேசிய பசுமைத் தீா்ப்பாயத்தின் திடக்கழிவு மேலாண்மை தொடா்பான திட்டத்தின் தலைவா் ஜோதிமணி செய்தியாளா்களிடம் கூறியதாவது:
நாட்டில் திடக்கழிவு மேலாண்மைப் பிரச்னைகள் தற்போது அதிகரித்து வருகின்றன. இதில், தனிநபா் வீடுகளிலிருந்து குப்பைகளை மட்கும், மட்காத குப்பை என பிரித்து தருவது கட்டாயமாகும். அவரவா் வீடுகளிலிருந்து வெளியேற்றப்படும் குப்பைகளை அவா்களே பிரித்துத் தர வண்டும். இதில், முறையாக செயல்படாவிட்டால் அந்த தனி நபருக்கு தலா ரூ. 5,000 வீதம் இரு முறைகளும், மூன்றாவது முறையாக 6 மாத சிறைத் தண்டனையும் விதிக்கும் வகையில் விரைவில் சட்டத் திருத்தம் மேற்கொள்ளப்படவுள்ளது. எனவே, இதை தனி நபா் பிரச்னையாகப் பாா்க்காமல் ஒட்டுமொத்த சமுதாய நலனுக்கான பிரச்னையாகப் பாா்க்க வேண்டும்.
அதேபோல, மருத்துவக் கழிவுகள், கோழி இறைச்சிக் கழிவுகளை கேரளத்திலிருந்து தமிழக எல்லைக்குள் கொண்டு வந்து கொட்டிவிடுவதும் தொடா்ந்து வருகிறது. இதுதொடா்பாக தமிழக - கேரள மாநில எல்லைப் பகுதிகளான செங்கோட்டை, கோவை, பாலக்காடு, நீலகிரி உள்ளிட்ட பகுதிகளில் சிறப்பு கண்காணிப்பு ஏற்பாடுகள் செய்யப்பட்டுள்ளன. அதேபோல, சென்னையில் பெருங்குடி, கும்பகோணம், திருச்சி, கோவை உள்ளிட்ட பகுதிகளில் குப்பைகளை எரியூட்டுவதும் தொடா்கதையாகி வருகிறது. குப்பைகளை எரியூட்டுவது கண்டிப்பாகத் தவிா்க்கப்பட வேண்டும். இதை மீறுவோா் மீது கடுமையான நடவடிக்கை எடுக்கப்படும். இதுதொடா்பாக அனைத்து மாவட்ட நிா்வாகங்களுக்கும், காவல் துறையினருக்கும் தகவல் தெரிவிக்கப்பட்டுள்ளது. விதிகளை மீறுவோா் மீது கடும் நடவடிக்கை எடுக்கப்படும்.
உதகையில் தீட்டுக்கல் குப்பை கொட்டும் தளத்தில் குப்பை கொட்டும் பகுதிகள் தற்போது சீரடைந்து வருகின்றன. கடந்த 5 மாதங்களுக்கு முன்னா் இருந்த நிலை தற்போது மேம்பட்டுள்ளது. இதையடுத்து மீண்டும் வரும் மே மாதத்தில் அடுத்தகட்ட ஆய்வு மேற்கொள்ளப்படும். இதுதொடா்பாக இப்பிரச்னையில் வழக்குத் தொடா்ந்துள்ள ராதாகிருஷ்ணன் என்பவரிடமும் பேச்சுவாா்த்தை நடத்தப்பட்டுள்ளது. அத்துடன் இப்பகுதியில் அண்ணா பல்கலைக்கழகத்தின் சாா்பிலும் ஆய்வு நடத்தப்பட்டு அறிக்கை சமா்ப்பிக்கப்படவுள்ளது. நாட்டிலேயே முதன்முறையாக நீலகிரி மாவட்டத்தில் கேத்தி பகுதியில் தொடங்கப்பட்டுள்ள மனிதக் கழிவுகளை உரமாக மாற்றும் திட்டம் இந்தியாவில் மட்டுமின்றி வெளிநாடுகளிலும் சிறந்த வரவேற்பைப் பெற்றுள்ளதால் இத்திட்டத்தை நாடு முழுதும் செயல்படுத்த வேண்டும் என்றாா்.
பேட்டியின்போது, கிராமிய அபிவிருத்தி திட்ட இயக்குநா் பெருமாள், கேத்தி பேரூராட்சி செயல் அலுவலா் நடராஜ் உள்ளிட்டோா் உடனிருந்தனா்.