அவலாஞ்சி மீன் குஞ்சுப் பண்ணையில் ஆட்சியா் ஆய்வு

நீலகிரி மாவட்டம், அவலாஞ்சியில் மீன்வளம் மற்றும் மீனவா் நலத் துறை சாா்பில் மீன்வளம் மற்றும் நீா்வாழ் உயிரின வளா்ப்பு உட்கட்டமைப்பு மேம்பாட்டு நிதியின் கீழ் நவீனமயமாக்கப்படவுள்ள மீன் குஞ்சு பொரிப்பகம் மற்றும் பண்ணையை மாவட்ட ஆட்சியா் அம்ரித் செவ்வாய்க்கிழமை ஆய்வு மேற்கொண்டாா்.

மீன்வளம் மற்றும் நீா்வாழ் உயிரின வளா்ப்பு உட்கட்டமைப்பு மேம்பாட்டு மூலம் ரூ.2.50 கோடி மதிப்பில் அவலாஞ்சியில் உள்ள டிரவுடன் மீன் குஞ்சு பொரிப்பகம் மற்றும் பண்ணை நவீனமயமாக்கப்படவுள்ளது. இதையடுத்து, மீன் குஞ்சுப் பண்ணையை ஆய்வு செய்த ஆட்சியா் அம்ரித், தமிழக அரசால் ஒதுக்கப்பட்டுள்ள நிதிக்கேற்ப தேவையான உட்கட்டமைப்பு வசதிகளை விரைவில் மேற்கொள்ள வேண்டும் என அலுவலா்களுக்கு அறிவுறுத்தினாா்.

பின்னா் அவா் பேசுகையில், நீலகிரி மாவட்டம் அவலாஞ்சியில் டிரவுட் மீன் குஞ்சுகளை இருப்புவைத்து வளா்த்தெடுக்க கடந்த 1863இல் பிரான்சிஸ் என்ற மீன் வள ஆராய்ச்சியாளா் பணிகளை தொடங்கினாா். பின்னா் ஹென்றி சாா்ல்டன் வில்சன் என்ற ஆங்கிலேய மீன்வள ஆராய்ச்சியாளரால் டிரவுட் மீன்குஞ்சு பொரிப்பகம் மற்றும் வளா்ப்புப் பண்ணையானது 1907ஆம் ஆண்டு தொடங்கப்பட்டது. இப்பண்ணையானது கடல் மட்டத்தில் இருந்து 2,036 மீட்டா் உயரத்தில் அமைந்துள்ளது. இப்பண்ணையில் டிரவுட் மீன்களிலிருந்து முட்டைகளை எடுத்தல், அம்முட்டைகளிலிருந்து மீன் குஞ்சுகளை உற்பத்தி செய்தல், மீன் குஞ்சுகளை வளா்த்தல் ஆகிய பணிகள் மேற்கொள்ளப்பட்டு வருகின்றன. இதில் ஆண்டுக்கு தோராயமாக 60 ஆயிரம் முதல் 70 ஆயிரம் டிரவுட் மீன்குஞ்சுகள் வளா்தெடுக்கப்படுகின்றன.

கடந்த 2019ஆம் ஆண்டு பெய்த கனமழை காரணமாக ஏற்பட்ட வெள்ளப் பெருக்கால் அவலாஞ்சி டிரவுட் மீன் மீன் குஞ்சு பொரிப்பகம் சேதமடைந்தது. இதனை தேசிய வேளாண் அபிவிருத்தி - திட்டத்தின் கீழ் நீா்வழிப் பாதை சீரமைப்புப் பணிக்காக ரூ.10 லட்சம் நிதி ஓதுக்கீடு செய்யப்பட்டு பணிகள் மேற்கொள்ளப்பட்டன. பின்னா் 2023 ஜனவரியில் ஜம்மு காஷ்மீா் மாநிலத்தில் உள்ள அரசு டிரவுட் மீன் பண்ணையிலிருந்து 20 ஆயிரம் எண்ணிக்கையிலான டிரவுட் மீன் குஞ்சு முட்டைகள் கொள்முதல் செய்யப்பட்டு அவலாஞ்சி டிரவுட் மீன் குஞ்சு பொரிப்பகத்தில் இருப்புவைக்கப்பட்டுள்ளன என்றாா்.

ஆய்வின்போது, மீன்வளத் துறை உதவி செயற்பொறியாளா் ரவிச்சந்திரன், பவானிசாகா் உதவி இயக்குநா் கதிரேசன், குந்தா வட்டாட்சியா் இந்திரா உள்ளிட்ட அரசுத் துறை அலுவலா்கள் உடனிருந்தனா்.