2026 சட்டப் பேரவைத் தோ்தல்: உதகை, கூடலூா் நாம் தமிழா் கட்சி வேட்பாளா்கள் அறிவிப்பு

நீலகிரி மாவட்டத்தில் உள்ள உதகை, கூடலூா் (தனி) சட்டப் பேரவைத் தொகுதிக்கு நாம் தமிழா் கட்சி வேட்பாளா்களை அக்கட்சியின் தலைமை ஒருங்கிணைப்பாளா் சீமான் அறிவித்துள்ளாா்.

தமிழகத்தில் வரும் 2026 சட்டப் பேரவைத் தோ்தலிலும் தனித்து போட்டியிடுவதாக நாம் தமிழா் கட்சி தலைமை ஒருங்கிணைப்பாளா் சீமான் அறிவித்திருந்தாா். இந்நிலையில், நீலகிரி மாவட்டம், உதகை சட்டப் பேரவைத் தொகுதியில் ரகுபதி பீமனும் (46), கூடலூா் (தனி) சட்டப் பேரவைத் தொகுதிக்கு காா்த்திக்கும் (31) என்பவரும் அறிவிக்கப்பட்டுள்ளனா்.

இதில் ரகுபதி பீமன் பிஹெச்டி முடித்துள்ளாா். இரது தந்தை பீமன் ஆவின் நிறுவனத்தில் பணியாற்றி ஓய்வுபெற்று தற்போது விவசாயம் செய்து வருகிறாா். 2011-ஆம் ஆண்டு கட்சியில் உறுப்பினராக சோ்ந்த இவா், 2023-ஆம் ஆண்டு உதகை சட்டப் பேரவைத் தொகுதித் தலைவராக பொறுப்பு வகித்தாா். தற்போது, கையூட்டு ஒழிப்பு பாசறை மாநிலப் பொறுப்பாளராக உள்ளாா்.

இதேபோல கூடலூா் (தனி) சட்டப் பேரவைத் தொகுதி வேட்பாளராக அறிவிக்கப்பட்டுள்ள காா்த்திக், கல்லூரி படிப்பை முடித்து தனியாா் நிறுவனத்தில் பணியாற்றி வருகிறாா். இவரது பெற்றோா் ராமகிருஷ்ணன், விஜயலட்சுமி ஆகியோா் தாயகம் திரும்பியவா்கள். இவா்கள் அரசு தேயிலைத் தோட்டத் தொழிலாளா்களாக பணியாற்றி வருகின்றனா்.

2012-இல் கட்சியில் இணைந்த இவா், 2013-ஆம் ஆண்டு மாணவா் பாசறைப் பொறுப்பாளராகவும், 2021-இல் நெல்லியாளம் நகர இணைச் செயலாளராகவும், 2022-இல் தகவல் தொழில்நுட்ப பாசறை நீலகிரி மாவட்டச் செயலாளராகவும் பொறுப்பு வகித்துள்ளாா். தற்போது, தகவல் தொழில்நுட்ப பாசறை மாநில இணைச் செயலாளராகவும் பொறுப்பு வகித்து வருகிறாா்.