பொங்கல் பண்டிகைக்கு இலவச வேட்டி, சேலை வழங்கும் திட்டத்தால் நெசவாளா்களுக்கு 6 மாதம் வேலைவாய்ப்பு கிடைத்துள்ளதாக கைத்தறி மற்றும் துணிநூல் துறை அமைச்சா் ஆா்.காந்தி தெரிவித்துள்ளாா்.
திருப்பூா் மாவட்ட ஆட்சியா் அலுவலகத்தில் விசைத்தறி வேட்டி, சேலை உற்பத்தி மற்றும் கொள்முதல் முன்னேற்றம் தொடா்பான ஆய்வுக் கூட்டம் சனிக்கிழமை நடைபெற்றது. இதில், திருப்பூா், கோவை, ஈரோடு மற்றும் திருச்செங்கோடு சரகங்கள் இடம் பெற்றிருந்தன. இக்கூட்டத்துக்கு கைத்தறி மற்றும் துணிநூல் துறை அமைச்சா் ஆா்.காந்தி, ஆதிதிராவிடா் நலத் துறை அமைச்சா் என்.கயல்விழி செல்வராஜ் ஆகியோா் தலைமை வகித்தனா். இதில் அமைச்சா் ஆா்.காந்தி பேசியதாவது:
வேட்டி, சேலை வழங்கும் திட்டத்துக்குத் தேவையான 177 லட்சம் வேட்டிகள், 177 லட்சம் சேலைகளில் இதுவரை 50 சதவீதம் உற்பத்தி செய்யப்பட்டுள்ளன. மேலும், 2023 ஜனவரி 10ஆம் தேதிக்குள் மீதமுள்ள வேட்டி, சேலைகளை போா்க்கால அடிப்படையில் உற்பத்தி செய்ய அறிவுறுத்தப்பட்டுள்ளது.
பொங்கல் பண்டிகைக்கு வழங்கப்படும் வேட்டி, சேலைகளில் மாறுதல் செய்யப்பட்டு தற்போது 15 புதிய வண்ணங்களில் சேலைகளும், வேட்டியில் ஒரு அங்குலத்தில் கரையும் உற்பத்தி செய்யப்பட்டு அனைத்து குடும்ப அட்டைதாரா்களுக்கும் வழங்கப்படவுள்ளது. இதன் மூலமாக ஒரு லட்சம் கைத்தறி, விசைத்தறி நெசவாளா்கள் 6 மாதத்துக்கு வேலைவாய்ப்பு பெற்றுள்ளனா். இத்திட்டத்தின் மூலமாக உபதொழில்களில் 50 ஆயிரம் போ் வேலைவாய்ப்பு பெற்றுள்ளனா் என்றாா்.
இதைத் தொடா்ந்து, திருப்பூா் சரகத்தில் உள்ள கைத்தறி நெசவாளா் கூட்டுறவு சங்க நெசவாளா்களுக்கு முத்ரா கடன் திட்டத்தின்கீழ் ரூ.5.50 லட்சம் மதிப்பில் கடனுதவிகளையும், கைத்தறி நெசவாளா் கூட்டுறவு சங்கங்களில் பணிபுரிந்து 60 வயது பூா்த்தியடைந்த கைத்தறி நெசவாளா்களுக்கு முதியோா் ஓய்வூதியம் பெறுவதற்கான ஆணைகளையும் அமைச்சா் வழங்கினாா்.
கூட்டத்தில், அரசு முதன்மைச் செயலா் (கைத்தறி, கைத்திறன், துணிநூல் மற்றும் கதா்த் துறை)தா்மேந்திர பிரதாப் யாதவ், கைத்தறித் துறை ஆணையா் த.பொ.ராஜேஷ், துணிநூல் துறை ஆணையா் மு.வள்ளலாா், மாவட்ட ஆட்சியா் எஸ்.வினீத், மாநகராட்சி மேயா் என்.தினேஷ்குமாா் உள்ளிட்ட பலா் கலந்து கொண்டனா்.