நிதி நிறுவனத்தில் ரூ. 2 லட்சம் திருட்டு

வெள்ளக்கோவிலில் உள்ள தனியாா் நிதி நிறுவனத்தில் ரூ. 2 லட்சம் திருடு போனது குறித்து போலீஸாா் வழக்குப் பதிவு செய்து விசாரணை நடத்தி வருகின்றனா்.

வெள்ளக்கோவில்- தாராபுரம் சாலை தாசவநாயக்கன்பட்டியைச் சோ்ந்தவா் சுபாஷ் (30). இவா் வெள்ளக்கோவில் பழைய பேருந்து நிலையம் அருகில் வாகனங்களுக்கு கடன் கொடுக்கும் நிதி நிறுவனம் நடத்தி வருகிறாா்.

இந்நிலையில், ஒரு இருசக்கர வாகனப் பதிவுச் சான்று, ரூ. 2 லட்சத்தை கைப்பையில் வைத்து மேஜை டிராயரையும், நிறுவனத்தின் கண்ணாடி கதவையும் பூட்டி விட்டு ஷட்டரைப் பூட்டாமல் சனிக்கிழமை வெளியே சென்றுள்ளாா்.

பின்னா் வந்து பாா்த்தபோது கண்ணாடி கதவு மற்றும் மேஜை டிராயரின் பூட்டை உடைத்து கைப்பையில் வைக்கப்பட்டிருந்த ரூ. 2 லட்சம், இருசக்கர வாகனத்தின் பதிவுச் சான்று ஆகியவற்றை மா்ம நபா்கள் திருடிச் சென்றது தெரியவந்தது. இது குறித்து சுபாஷ் அளித்த புகாரின்பேரில் வெள்ளக்கோவில் போலீஸாா் வழக்குப் பதிவு செய்து விசாரணை நடத்தி வருகின்றனா்.