அலகுமலையில் ஜல்லிக்கட்டுப் போட்டி: 577 காளைகள், 375 மாடுபிடி வீரா்கள் பங்கேற்பு

பல்லடம் அருகே பொங்கலூா் ஒன்றியம் அலகுமலையில் ஜல்லிக்கட்டுப் போட்டி செவ்வாய்க்கிழமை நடைபெற்றது. இதில் 577 காளைகளும், 375 மாடுபிடி வீரா்களும் பங்கேற்றனா்.

திருப்பூா் மாவட்டம், பல்லடம் அருகேயுள்ள அலகுமலையில் மாவட்ட நிா்வாகம் மற்றும் அலகுமலை ஜல்லிக்கட்டு காளைகள் நலச்சங்கம் ஆகியன சாா்பில் ஜல்லிக்கட்டுப் போட்டி நடைபெற்றது. மாவட்ட ஆட்சியா் எஸ். வினீத் தலைமை வகித்தாா். பொங்கலூா் ஊராட்சி ஒன்றியக் குழு தலைவா் வழக்குரைஞா் எஸ்.குமாா், ஒன்றிய கவுன்சிலா் எஸ்.பாலுசாமி ஆகியோா் முன்னிலை வகித்தனா். அலகுமலை ஜல்லிக்கட்டு காளைகள் நலச்சங்கத் தலைவா் பழனிசாமி வரவேற்றாா். போட்டியை அமைச்சா் மு.பெ.சாமிநாதன் தொடங்கிவைத்தாா்.

போட்டியில் மொத்தம் 577 காளைகளும், 375 மாடுபிடி வீரா்களும் பங்கேற்றனா். ஜல்லிக்கட்டுப் போட்டியில் முதலில் கோயில் காளை அவிழ்த்துவிடப்பட்ட பின்னா் மற்ற காளைகள் வாடிவாசல் வழியாக ஒன்றன்பின் ஒன்றாக அவிழ்த்துவிடப்பட்டன. இதில் சீறிப்பாய்ந்து வந்த காளைகளை, மாடுபிடி வீரா்கள் மடக்கிப் பிடித்தது பாா்வையாளா்களை பரவசப்படுத்தியது.

2 கி.மீ. முன்பாகவே வாகனங்கள் நிறுத்தம்:

ஜல்லிக்கட்டுப் போட்டி நடைபெறுவதை ஒட்டி அலகுமலை செல்லும் பேருந்துகள் பெருந்தொழுவு வழியாகத் திருப்பிவிடப்பட்டன. மேலும் நான்கு மற்றும் இருசக்கர வாகனங்கள் சுமாா் 2 கி.மீ.,க்கு முன்பாகவே நிறுத்தப்பட்டன. முக்கியப் பிரமுகா்கள், ஆம்புலன்ஸ், காவல் துறை, அரசு அதிகாரிகளின் வாகனங்கள் மட்டும் ஜல்லிகட்டு மைதானம் வரையில் அனுமதிக்கப்பட்டன.

பலத்த போலீஸ் பாதுகாப்பு:

ஜல்லிக்கட்டுப் போட்டி நடைபெற்ற இடத்தைச் சுற்றிலும் மாவட்ட போலீஸ் எஸ்.பி.சசாங் சாய் தலைமையில் பலத்த போலீஸ் பாதுகாப்பு போடப்பட்டிருந்தது. 1301 போலீஸாா் பாதுகாப்புப் பணியில் ஈடுபட்டிருந்தனா்.

57 போ் காயம்

போட்டியில் தமிழகம் முழுவதும் பல்வேறு மாவட்டங்களில் இருந்து மாடுபிடி வீரா்கள் பங்கேற்றனா். இதில் மதுரை, தேனி, சேலம், புதுக்கோட்டை மாவட்டங்களைச் சோ்ந்த 57 மாடுபிடி வீரா்கள் காயம் அடைந்தனா். அதில் படுகாயமடைந்த 13 பேருக்கு அலகுமலை தற்காலிக மருத்துவ முகாமில் முதலுதவி சிகிச்சை அளிக்கப்பட்ட பிறகு திருப்பூா் அரசு மருத்துவமனைக்கு 108 ஆம்புலன்ஸ் வாகனத்தில் அனுப்பிவைக்கப்பட்டனா்.

பரிசளிப்பு

போட்டியில் பிடிபடாத காளைகளுக்கும், சிறந்த மாடுபிடி வீரா்களுக்கும் மாலையில் நடைபெற்ற பரிசளிப்பு விழாவில் அமைச்சா் கயல்விழி செல்வராஜ், மாவட்ட ஆட்சியா் வினீத், சாா் ஆட்சியா் ஸ்ருதன் ஜெய் நாராயணன்,திருப்பூா் மாநகராட்சி 4ஆவது மண்டலத் தலைவா் இல.பத்மநாபன், பொங்கலூா் ஊராட்சி ஒன்றியக் குழு தலைவா் வழக்குரைஞா் எஸ்.குமாா், ஒன்றிய கவுன்சிலா் எஸ்.பாலுசாமி ஆகியோா் பரிசுகளை வழங்கினா்.

விழாவில் திருப்பூா் மாநகராட்சி மேயா் தினேஷ்குமாா், 4ஆவது மண்டலத் தலைவா் இல.பத்மநாபன், பல்லடம் நகா்மன்றத் தலைவா் கவிதாமணி ராஜேந்திரகுமாா், இணை இயக்குநா் (கால்நடை பராமரிப்புத் துறை) குமாரரத்தினம், ஜல்லிக்கட்டு பேரவைத் தலைவா் ராஜசேகரன், பல்லடம் நகர திமுக செயலாளா் ந.ராஜேந்திரகுமாா், பொங்கலூா் கிழக்கு ஒன்றிய திமுக செயலாளா் எஸ்.பாலுசாமி, அவைத் தலைவா் சண்முகம் உள்பட பலா் பங்கேற்றனா்.