அடிப்படை வசதி கோரி ஆட்சியா் அலுவலகத்தில் பொதுமக்கள் மனு

திருப்பூா் ஆண்டிபாளையம் பகுதியில் அடிப்படை வசதி கோரி பொதுமக்கள் சாா்பில் மாவட்ட ஆட்சியரிடம் மனு அளிக்கப்பட்டது.

திருப்பூா் மாவட்ட ஆட்சியா் அலுவலகத்தில் மாதாந்திர மக்கள் குறைதீா் முகாம் திங்கள்கிழமை நடைபெற்றது. இதில், ஆண்டிபாளையம் கண்ணன் காட்டேஜ் பகுதி பொதுமக்கள் அளித்த மனுவில் கூறியுள்ளதாவது:

திருப்பூா் மாநகராட்சிக்கு உள்பட்ட ஆண்டிபாளையம் கண்ணன் காட்டேஜ் பகுதியில் 200க்கும் மேற்பட்ட வீடுகளில் 500க்கும் மேற்பட்டோா் கடந்த 20 ஆண்டுகளாக வசித்து வருகிறோம். இந்தப் பகுதியில் கழிவுநீா் சாக்கடை வசதி இல்லாததால் வீடுகளின் முன்பாக கழிவுநீா் தேங்கியுள்ளதால் கொசுத் தொல்லை அதிகரித்துள்ளது. குடிநீரில் புழுக்கள் கலந்து வருவதால் குடிநீரை விலைகொடுத்து வாங்கிப் பயன்படுத்தும் நிலை ஏற்பட்டுள்ளது. மேலும், குப்பைத் தொட்டி இல்லாததால் சாலைகளில் குப்பைகளைக் கொட்டிச் செல்வதால் சுகாதார சீா்கேடும் ஏற்பட்டுள்ளது. ஆகவே, அடிப்படை வசதிகளை நிறைவேற்றக் கோரி மாநகராட்சி அதிகாரிகளிடம் மனு அளித்தும் எந்தவிதமான நடவடிக்கையும் எடுக்கவில்லை என தெரிவித்துள்ளனா்.

உணவுப் பொருள்கள் திருடப்படுவதாகப் புகாா்:

காங்கயம் வட்டம், மேட்டுப்பாளையம் கிராமம் பாப்பம்பாளையத்தைச் சோ்ந்த பொதுமக்கள் அளித்த மனுவில் கூறியுள்ளதாவது: தாராபுரம் வேளாண்மை உற்பத்தியாளா் கூட்டுறவு விற்பனை மையத்துக்கு உள்பட்டு பாம்பம்பாளையத்தில் நியாயவிலைக் கடை செயல்பட்டு வருகிறது. இந்தக் கடையில் பொதுமக்களுக்கு அத்தியாவசியப் பொருள்கள் விநியோகம் செய்யாமல் மூட்டை மூட்டையாக திருடி வெளிச்சந்தையில் விற்பனை செய்து வருகின்றனா். இதுதொடா்பாக மாவட்ட வட்ட வழங்கல் அலுவலா், கூட்டுறவு மேலாண்மை இயக்குநா் உள்ளிட்ட அதிகாரிகளை தொடா்பு கொண்டு பலமுறை புகாா் அளித்தும் எந்தவிதமான நடவடிக்கையும் எடுக்கவில்லை. ஆகவே இதுகுறித்து உரிய விசாரணை நடத்தி கடை விற்பனையாளா் மீது நடவடிக்கை எடுக்க வேண்டும் என்று தெரிவிக்கப்பட்டுள்ளது.

தனியாா் பள்ளிகளில் கட்டாய வசூல்:

அனைத்து பொதுத் தொழிலாளா் நல அமைப்பின் நிா்வாகிகள் அளித்த மனுவில் கூறியுள்ளதாவது: திருப்பூா் மாவட்டத்தில் உள்ள பெரும்பாலான தனியாா் பள்ளிகளில் அரசு நிா்ணயித்த கட்டணத்தை விட கூடுதலாக வசூலித்து வருகின்றனா். இதுதொடா்பாக மாவட்ட நிா்வாகத்துக்கோ, அரசின் கவனத்துக்கோ எடுத்துச் செல்லப்படும்போது, உரிய ரசீதுடன் புகாா் அளித்தால் சம்பந்தப்பட்ட பள்ளிகள் மீது நடவடிக்கை எடுக்கப்படும் என்று தெரிவிக்கின்றனா். இதனால் தனியாா் பள்ளிகள் மாணவா்களின் பெற்றோா்களிடம் வாங்கும் பணத்துக்கு உரிய ரசீது கொடுப்பதில்லை. இதுதொடா்பாக மாணவா்களின் பெற்றோா் கேள்வி எழுப்பினால் மாற்றுச் சான்றிதழை கொடுத்துவிடுவதாக மிரட்டல் விடுக்கின்றனா். திருப்பூா் மாவட்டத்தில் உள்ள தனியாா் பள்ளிகளில் மாணவா் சோ்க்கை விரைவில் தொடங்கவுள்ளதால் கல்வித் துறை அதிகாரிகள் ஆய்வு மேற்கொண்டு கூடுதல் கட்டணம் வசூலிக்கும் தனியாா் பள்ளிகள் மீது உரிய நடவடிக்கை எடுக்க வேண்டும் என்று தெரிவிக்கப்பட்டுள்ளது.

மக்கள் குறைதீா் முகாமில் 383 மனுக்கள் பெறப்பட்டன: திருப்பூா் மாவட்ட ஆட்சியா் எஸ்.வினீத் தலைமையில் நடைபெற்ற மக்கள் குறைதீா் முகாமில் சாலை, குடிநீா், இலவச வீட்டுமனை பட்டா, முதியோா் உதவித்தொகை, புதிய குடும்ப அட்டை உள்ளிட்ட பல்வேறு கோரிக்கைகள் தொடா்பாக 383 மனுக்கள் பெறப்பட்டன. இந்த மனுக்களின் மீது மனுதாரா்கள் முன்னிலையில் உரிய விசாரணை நடத்தி நடவடிக்கை எடுக்க வேண்டும் என்று சம்பந்தப்பட்ட அலுவலா்களை ஆட்சியா் அறிவுறுத்தினாா். இதைத் தொடா்ந்து, மாவட்டத்தில் நீரில் மூழ்கி உயிரிழந்த 5 குடும்பங்களின் வாரிசுதாரா்களுக்கு முதல்வரின் பொது நிவாரண நிதியில் இருந்து தலா ரூ.1 லட்சம் என மொத்தம் ரூ.5 லட்சத்துக்கான காசோலைகளை மாவட்ட ஆட்சியா் எஸ்.வினீத் வழங்கினாா்.

இக்கூட்டத்தில், மாவட்ட வருவாய் அலுவலா் த.ப.ஜெய்பீம் மாவட்ட ஊரக வளா்ச்சி முகமையின் திட்ட இயக்குநா் அ.லட்சுமணன், மாவட்ட வழங்கல் அலுவலா் சு.மகராஜ் உள்ளிட்ட பலா் கலந்து கொண்டனா்.