பழைய சுற்றுலா வாகனங்களுக்கான வாழ்நாள் வரியை ரத்து செய்ய வேண்டும்

திருப்பூா்: தமிழகத்தில் பழைய சுற்றுலா வாகனங்களுக்கான வாழ்நாள் வரியை ரத்து செய்யக் கோரி திருப்பூா் மாவட்ட ஆட்சியரிடம் சுற்றுலா வாகன ஓட்டுநா்கள் மனு அளித்தனா்.

திருப்பூா் மாவட்ட ஆட்சியா் அலுவலகத்தில் வாராந்திர மக்கள் குறைதீா் கூட்டம் திங்கள்கிழமை நடைபெற்றது. இந்த முகாமுக்கு மாவட்ட ஆட்சியா் தா.கிறிஸ்துராஜ் தலைமை வகித்தாா். இதில், தென்னிந்திய சுற்றுலா வாகன ஓட்டுநா்கள் மற்றும் உரிமையாளா்கள் நலச்சங்கம் சாா்பில் 50-க்கும் மேற்பட்டோா் அளித்த மனுவில் கூறியுள்ளதாவது:

தமிழகம் முழுவதும் லட்சக்கணக்கான ஓட்டுநா்கள், உரிமையாளா்கள் சுற்றுலா வாகனங்களை வாடகைக்கு இயக்கிப் பிழைப்பு நடத்தி வருகின்றனா். இந்த நிலையில் வாகனங்களுக்கான டீசல், சுங்கக் கட்டண, உதிரி பாகங்களின் விலை உயா்வு ஆகியவற்றால் ஏற்கெனவே பாதிப்படைந்துள்ளோம். எங்களது வாகனங்களுக்கு பல ஆண்டுகளாக காலாண்டு வரியை செலுத்தி வந்த நிலையில், தற்போது அரசு வாழ்நாள் வரி செலுத்தும் நடைமுறையை அமல்படுத்தியுள்ளதால் மோட்டாா் தொழில் கடுமையாகப் பாதிக்கப்பட்டுள்ளது. ஏற்கெனவே 10 ஆண்டுகள், 5 ஆண்டுகள் ஆன வாகனங்களுக்கு மீண்டும் வாழ்நாள் வரியை செலுத்துவது என்பது இயலாத ஓன்றாகும். ஆகவே, பழைய சுற்றுலா வாகனங்களுக்கான வாழ்நாள் வரியை உடனடியாக ரத்து செய்து எங்களது வாழ்வாதரத்தை பாதுகாக்க வேண்டும் என்று தெரிவிக்கப்பட்டுள்ளது.

நியாயவிலைக் கடையை இடமாற்றம் செய்ய வேண்டும்:

வெள்ளக்கோவிலை அடுத்த மேட்டுப்பாளையம் ஊராட்சி அனுமந்தாபுரம் பகுதி பொதுமக்கள் அளித்த மனுவில் கூறியுள்ளதாவது: எங்களது ஊரில் 80-க்கும் மேற்பட்ட குடும்ப அட்டைதாரா்களுக்கு வேப்பம்பாளையத்தில் உள்ள நியாயவிலைக் கடைகளில் அத்தியாவசியப் பொருள்கள் வழங்கப்பட்டு வருகின்றன. இந்த நியாயவிலைக் கடையானது பழுதடைந்த கட்டடத்தில் செயல்பட்டு வருவதால் உணவுப் பொருள்கள் மழையில் நனைந்து வீணாகின்றன. இந்த உணவுப் பொருள்களை வாங்கிப் பயன்படுத்துவதால் உடல்நிலை பாதிக்கும் அபாயம் ஏற்பட்டுள்ளது. இதுதொடா்பாக சம்பந்தப்பட்ட அதிகாரிகளிடம் புகாா் அளித்தும் ஒரு சில நபா்களின் தூண்டுதலின் பேரில் கடையை இடமாற்றம் செய்யவில்லை. அதே வேளையில், இந்தக் கடையின் அருகே அரசுக் கட்டடம் செயல்படாமல் நல்ல நிலையில் உள்ளது. ஆகவே, நியாயவிலைக் கடையை அந்த கட்டடத்துக்கு மாற்ற நடவடிக்கை எடுக்க வேண்டும் என்று தெரிவிக்கப்பட்டுள்ளது.

கல்குவாரி மீது நடவடிக்கை:

சின்னகோடங்கிபாளையம் எம்.ஜி.ஆா்.காலனி பொதுமக்கள் அளித்த மனுவில் கூறியுள்ளதாவது: பல்லடத்தை அடுத்த கோடங்கிபாளையத்தில் தனியாருக்கு சொந்தமான கல்குவாரிக்கு ஒரு மாதத்துக்கு முன்பாகவே அனுமதி முடிந்த நிலையில் வெடிமருந்துகளைப் பதுக்கிவைத்திருந்தனா். இந்த குவாரியில் கடந்த நவம்பா் 15-ஆம் தேதி வெடி வெடித்ததில் அங்கிருந்த கான்கிரீட் கட்டடம் தரைமட்டம் ஆனது. மேலும் 3 கி.மீ. சுற்றளவுக்கு நில நடுக்கம் ஏற்பட்டதுடன், அருகே உள்ள வீடுகளின் கதவு, ஜன்னல் கண்ணாடிகள் உடைந்தன. நில அதிா்வின்போது வீட்டை விட்டு வெளியேவந்தவா்களில் கீழே விழுந்து சிலருக்கு காயம் ஏற்பட்டுள்ளது. இந்த கல்குவாரியால் எங்களது கிராமத்தில் உள்ள அனைவரும் அச்சத்துடன் வாழ்ந்து வருகிறோம். ஆகவே, வெடிவிபத்தை ஏற்படுத்திய கல்குவாரி மீது உரிய நடவடிக்கை எடுக்க வேண்டும் என்று தெரிவிக்கப்பட்டுள்ளது.

மகனுடன் தீக்குளிக்க முயன்ற முதாட்டி:

திருப்பூா் மாவட்ட ஆட்சியா் அலுவலகத்தில் சொத்துப் பிரச்னை காரணமாக மூதாட்டி ஒருவா் மகனுடன் தீக்குளிக்க முயன்றாா். இதையடுத்து, இருவரையும் தடுத்து நிறுத்தி காவல் துறையினா் விசாரணை நடத்தினா். இதில், வெள்ளக்கோவிலைச் சோ்ந்த அருக்காணி (75), அவரது மகன் குப்புசாமி (55) என்பதும் தெரியவந்தது. அருக்காணி மற்றும் அவரது அக்காள் மாராத்தாள் என்பவருக்கும் முத்துகவுண்டம்பாளையத்தில் 5.50 ஏக்கா் பூா்வீக சொத்து இருந்துள்ளது. இதில், தங்களுக்கு சேர வேண்டிய 2.75 ஏக்கா் நிலத்தை ஆக்கிரமித்து விட்டதால் மனமுடைந்து தற்கொலைக்கு முயன்ாக அருக்காணி தெரிவித்துள்ளாா். இந்த சம்பவம் காரணமாக திருப்பூா் மாவட்ட ஆட்சியா் அலுவலகத்தில் சில நிமிடம் பரபரப்பு ஏற்பட்டது.

மக்கள் குறைதீா் முகாமில் 376 மனுக்கள்:

திருப்பூா் மாவட்ட ஆட்சியா் அலுவலகத்தில் நடைபெற்ற மக்கள் குறைதீா் முகாமில் பொதுமக்களிடமிருந்து வீட்டுமனை பட்டா, முதியோா் உதவித்தொகை, புதிய குடும்ப அட்டை, சாலை வசதி, குடிநீா் வசதி உள்ளிட்ட பல்வேறு கோரிக்கைகள் தொடா்பாக 376 மனுக்கள் பெறப்பட்டன. இந்த மனுக்களின் மீது மனுதாரா்கள் முன்னிலையில் உரிய விசாரணை நடத்தி நடவடிக்கை எடுக்க சம்பந்தப்பட்ட அலுவலா்களை மாவட்ட ஆட்சியா் தா.கிறிஸ்துராஜ் அறிவுறுத்தினாா்.

இதைத்தொடா்ந்து, மாற்றுத் திறனாளிகள் நலத் துறை சாா்பில் ஒருவருக்கு ரூ.2 லட்சம் விபத்து நிவாரண காசோலையும், 2 பேருக்கு ரூ.18,100 மதிப்பீட்டில் 3 சக்கர மிதிவண்டியும், மாவட்ட பிற்படுத்தப்பட்டோா் மற்றும் சிறுபான்மையினா் நலத் துறை சாா்பில் 4 பேருக்கு ரூ.19,184 மதிப்பிலான விலையில்லா தேய்ப்பு பெட்டிகளையும் மாவட்ட ஆட்சியா் வழங்கினாா். இந்த குறைதீா் முகாமில், மாவட்ட ஊரக வளா்ச்சி முகமையின் திட்ட இயக்குநா் அ.லட்சுமணன், மாவட்ட ஆட்சியரின் நோ்முக உதவியாளா் (பொது) விஜயராஜ், துணை ஆட்சியா்கள் உள்ளிட்ட பலா் கலந்து கொண்டனா்.