உடுமலை அருகே ரூ.72 கோடியில் காண்டூா் கால்வாய் சீரமைப்புப் பணி

உடுமலை அருகே ரூ.72 கோடி மதிப்பீட்டில் காண்டூா் கால்வாய் சீரமைப்புப் பணிகளை மாவட்ட ஆட்சியா் தா.கிறிஸ்துராஜ் ஆய்வு செய்தாா்.

திருப்பூா் மாவட்டம், உடுமலை வட்டம், தளி கிராமத்தில் தாட்கோ நிலங்களையும், குருமலை சாலை அமைப்பது குறித்தும், ரூ.72 கோடி மதிப்பீட்டில் நடைபெற்று வரும் காண்டூா் கால்வாய் சீரமைக்கும் பணிகளையும் மாவட்ட ஆட்சியா் தா.கிறிஸ்துராஜ் ஞாயிற்றுக்கிழமை பாா்வையிட்டு ஆய்வு மேற்கொண்டாா்.

அப்போது அவா் பேசியதாவது: பொதுமக்கள் பயன் பெறும் வகையில் பல்வேறு திட்டங்களை தமிழக முதல்வா் மு.க.ஸ்டாலின் செயல்படுத்தி வருகிறாா். அதிலும் குறிப்பாக ஆதிதிராவிடா் மற்றும் பழங்குடியினா் நலத் துறையின் சாா்பில் பல்வேறு திட்டங்களைஅறிவித்து செயல்படுத்தி வருகிறாா். இதன் ஒரு பகுதியாக உடுமலை வட்டம், தளி கிராமத்தில் 88.67 ஏக்கா் பரப்பளவில் உள்ள தாட்கோ நிலத்தை ஆதிதிராவிடா் மற்றும் பழங்குடியினா் பொருளாதார மேம்பாட்டுக்காக ஆய்வு மேற்கொள்ளப்பட்டது.

மேலும், திருமூா்த்தி மலை முதல் குருமலை வரை குருமலை, மேல்குருமலை, கருமுட்டி, ஆட்டுமலை, குளிப்பட்டி, கோடந்துாா், காட்டுப்பட்டி, பூச்சிக்கொட்டாம்பாறை ஆகிய மலை கிராம மக்கள் பயனடையும் வகையில் 5.37 கிலோ மீட்டா் தொலைவுக்கு சாலை அமைப்பது தொடா்பாகவும், நல்லாறு முதல் வல்லகுண்டாபுரம் வரை மற்றும் ஜிலேபிநாயக்கன்பாளையம் முதல் வல்லக்குண்டாபுரம் வரை 5.1 கிலோ மீட்டா் தொலைவுக்கு சாலை அமைப்பது தொடா்பாக ஆய்வு மேற்கொள்ளப்பட்டது. இதைத் தொடா்ந்து, ரூ.72 கோடியில் காண்டூா் கால்வாய் சீரமைக்கும் பணிகள் தொடா்பாகவும் ஆய்வு மேற்கொள்ளப்பட்டது என்றாா்.

ஆய்வின்போது, மாவட்ட வன அலுவலா் தேவேந்திரகுமாா் மீனா, மாவட்ட மேலாளா் (தாட்கோ) ரஞ்சித்குமாா், செயற்பொறியாளா் (தாட்கோ) கே.சரஸ்வதி, வனச் சரகா் மணிகண்டன், உதவிப் பொறியாளா்கள் கே.மாரிமுத்து, ஜெயக்குமாா், உடுமலை வட்டாட்சியா் சுந்தரம் உள்ளிட்ட பலா் உடனிருந்தனா்.