மாற்றுத்திறன் குழந்தைகளுக்கான ஒருங்கிணைந்த மருத்துவ மதிப்பீட்டு முகாம்

திருப்பூா் மாவட்டத்தில் பள்ளிக் கல்வித் துறை மற்றும் மாற்றுத்திறனாளிகள் நலத் துறை இணைந்து நடத்தும் மாற்றுத்திறன் குழந்தைகளுக்கான ஒருங்கிணைந்த மருத்துவ மதிப்பீட்டு முகாம் வியாழக்கிழமை தொடங்கியது.

இந்த மருத்துவ முகாம்கள் வியாழக்கிழமை தொடங்கி 2026 ஜனவரி 9-ஆம் தேதி வரை வரை மாவட்டத்திலுள்ள அனைத்து வட்டாரங்களிலும் நடைபெற உள்ளது.

திருப்பூா், அரண்மனைப்புதூா் நடுநிலைப் பள்ளியில் நடைபெற்ற மாற்றுத்திறன் குழந்தைகளுக்கான மருத்துவ முகாமை மாவட்ட ஆட்சியா் மனீஷ் வியாழக்கிழமை பாா்வையிட்டாா்.

இதைத் தொடா்ந்து, அவிநாசி அரசு பெண்கள் மேல்நிலைப் பள்ளி, மடத்துக்குளம் அரசு மேல்நிலைப்பள்ளிகளில் வெள்ளிக்கிழமையும்(டிச.5), ஊத்துக்குளி அரசு ஆண்கள் மேல்நிலைப் பள்ளி, வெள்ளக்கோவில் அறிஞா் அண்ணா அரசு மேல்நிலைப்பள்ளிகளில் டிசம்பா் 8-ஆம் தேதியும், குடிமங்கலம் அரசு மேல்நிலைப்பள்ளியில் 9-ஆம் தேதியும், திருப்பூா் வடக்கு, தேவாங்கபுரம் மாநகராட்சி நடுநிலைப் பள்ளியில் 10-ஆம் தேதியும், பல்லடம் வட்டம் ஊராட்சி ஒன்றிய நடுநிலைப் பள்ளியில் 12-ஆம் தேதியும் மருத்துவ முகாம்கள் நடைபெற உள்ளன.

அதேபோல, பொங்கலூா் பி.யூ.வி.என். தொடக்கப் பள்ளியில் 2026 ஜனவரி 5- ஆம் தேதியும், குண்டடம் அரசு மேல்நிலைப் பள்ளியில் ஜனவரி 6-ஆம் தேதியும், மூலனூா் அரசு மேல்நிலைப் பள்ளியில் 7-ஆம் தேதியும்

உடுமலைப்பேட்டை அரசு மேல்நிலைப் பள்ளியில் 8-ஆம் தேதியும், காங்கயம் அரசு மேல்நிலைப் பள்ளியில் ஜனவரி 9-ஆம் தேதியும் மாற்றுத்திறன் குழந்தைகளுக்கான ஒருங்கிணைந்த மருத்துவ மதிப்பீட்டு முகாம் நடைபெற உள்ளன.

பிறப்பு முதல் 18 வயது வரையிலான மாற்றுத்திறன் மாணவா்களுக்கான இந்த மருத்துவ முகாமில் நரம்பியல் மருத்துவா், காது, மூக்கு, தொண்டை சிறப்பு மருத்துவா், மனநல மருத்துவா், கண் மருத்துவா், குழந்தைகள் நல மருத்துவா், முட நீக்கியல் மருத்துவா் ஆகியோா் மாற்றுத்திறன் குழந்தைகளை ஆய்வு செய்து சிகிச்சை மற்றும் மறுவாழ்வு சிகிச்சைகளுக்கு ஆலோசனை வழங்குகின்றனா்.

தொடக்க நிகழ்ச்சியில், மாவட்ட முதன்மைக் கல்வி அலுவலா் புனிதா அந்தோனியம்மாள், மாவட்ட மாற்றுத்திறனாளிகள் நல அலுவலா் சரவணகுமாா், அனைவருக்கும் கல்வித் திட்ட மாவட்ட ஒருங்கிணைப்பாளா் பாலசுந்தரி, ஆசிரியா்கள், மாற்றுத் திறனாளிகள் மற்றும் துறை சாா்ந்த அலுவலா்கள் கலந்து கொண்டனா்.