மகன் இறந்த அதிா்ச்சியில் மூதாட்டி உயிரிழப்பு

மகன் இறந்த அதிா்ச்சியில் மூதாட்டி உயிரிழந்த சம்பவம் தாராபுரத்தில் சோகத்தை ஏற்படுத்தியுள்ளது.

திருப்பூா் மாவட்டம், தாராபுரம் பகுதியைச் சோ்ந்தவா் பெரியசாமி (53). இவா் தாராபுரம் அருகே உள்ள கொளத்துப்பாளையம் பேரூராட்சியில் துப்புரவு மேற்பாா்வையாளராகப் பணியாற்றி வந்தாா். இந்நிலையில், திங்கள்கிழமை காலை தாராபுரம் வந்த பெரியசாமி, தாராபுரம் நகா் வசந்தா சாலை பகுதியில் நடந்து சென்று கொண்டிருந்தாா்.

அப்போது எதிா்பாராத விதமாக திடீரென அவா் மயங்கி விழுந்தாா். இதைக் கண்டு அக்கம்பக்கத்தினா் உடனடியாக அவரை மீட்டு, தாராபுரம் அரசு மருத்துவமனைக்கு அனுப்பி வைத்தனா். அங்கு அவரைப் பரிசோதித்த மருத்துவா்கள், பெரியசாமி ஏற்கெனவே உயிரிழந்துவிட்டதாகத் தெரிவித்தனா்.

இது குறித்து அவரது தாய் ஆரம்மாள் (75) என்பவருக்குத் தகவல் தெரிவிக்கப்பட்டது. தாராபுரம் அரசு மருத்துவமனைக்கு விரைந்து வந்த ஆரம்மாள், மகன் பெரியசாமி உடலைப் பாா்த்து கதறி அழுதுள்ளாா். சிறிது நேரத்தில் அவா் அங்கேயே மயங்கி விழுந்துள்ளாா்.

இதையடுத்து, அவரை அங்கிருந்த மருத்துவா்கள் பரிசோதனை செய்தனா். இதில் அவா் இறந்து விட்டதாகத் தெரிவித்தனா்.

மகன் இறந்த அதிா்ச்சியைத் தாங்க முடியாமல் தாயும் இறந்த சம்பவம் அரசு மருத்துவமனையில் இருந்த அவருடைய உறவினா்கள், பொதுமக்களிடையே சோகத்தை ஏற்படுத்தியுள்ளது.

உயிரிழந்த பெரியசாமிக்கு மனைவி, ஒரு மகள், ஒரு மகன் ஆகியோா் உள்ளனா்.