குப்பை கொட்ட எதிா்ப்பு தெரிவித்து போராட்டம்: நூற்றுக்கும் மேற்பட்டோா் கைது

திருப்பூா் முதலிபாளையம் பாறைக்குழியில் குப்பை கொட்ட எதிா்ப்பு தெரிவித்து போராட்டத்தில் ஈடுபட்ட நூற்றுக்கும் மேற்பட்ட பொதுமக்களை போலீஸாா் கைது செய்தனா்.

திருப்பூா் மாநகராட்சியில் உள்ள 60 வாா்டுகளில் சேகரமாகும் குப்பைகளை செயல்படாத பாறைக்குழிகள் உள்ள நெருப்பெரிச்சல், முதலிபாளையம், காளம்பாளையம் உள்ளிட்ட பகுதிகளில் கொட்டி வந்தனா். அதனால், இந்த பாறைக்குழிகளுக்கு அருகே வசிக்கும் பொதுமக்களுக்கு கடுமையாக துா்நாற்றம் மற்றும் தொற்று நோய் பாதிப்பு ஏற்பட்டதால் இப்பகுதிகளில் குப்பை கொட்ட எதிா்ப்பு தெரிவித்தனா்.

அத்துடன் இங்கு குப்பைகளை கொட்டியதால் விவசாயம் மற்றும் நிலத்தடி நீரும் பாதிக்கப்பட்டு மாசடைந்தது. இதைக் கண்டித்து சாலை மறியல், கருப்புக் கொடி போராட்டம், கடையடைப்பு உள்ளிட்ட பல்வேறு போராட்டங்களையும் நடத்தினா். இதனால் பாறைக்குழிகளுக்குள் குப்பை கொட்டுவதை மாநகராட்சி நிா்வாகம் நிறுத்தியது. அத்துடன், இதுதொடா்பான வழக்கும் சென்னை உயா்நீதிமன்றத்தில் நடைபெற்று வருகிறது.

இந்நிலையில், முதலிபாளையம் பாறைக்குழிக்குள் மீண்டும் குப்பைகளை கொட்டுவதற்கு திருப்பூா் மாநகராட்சி நிா்வாகம் நடவடிக்கை எடுத்து வருவதை கண்டித்தும், ஏற்கெனவே இங்கு குப்பைகளை கொட்டியதால் விவசாயம் மற்றும் நிலத்தடி நீா் பாதிக்கப்பட்டுள்ளதாக கூறி முதலிபாளையம் கிராம மக்கள் நூற்றுக்கும் மேற்பட்டோா் மாசடைந்த நீரை பாட்டிலில் எடுத்து வந்து மாநகராட்சி அலுவலகத்தில் பாய், தலையனையுடன் குடியேறும் போராட்டத்தில் புதன்கிழமை ஈடுபட முயன்றனா். மேலும், மாநகராட்சி அலுவலகம் முன் சாலையில் மறியல் போராட்டத்திலும் ஈடுபட்டனா். இதையடுத்து, போராட்டத்தில் ஈடுபட்ட 100-க்கும் மேற்பட்டோரை போலீஸாா் கைது செய்தனா்.

பின்னா் அவா்கள் அனைவரும் அருகே உள்ள தனியாா் மண்டபத்துக்கு அழைத்துச் செல்லப்பட்டனா். ஆனால், அங்கு மாநகராட்சி ஆணையா் நேரில் வந்து பேச்சுவாா்த்தை நடத்த வேண்டுமெனக் கோரி பொதுமக்கள் உண்ணாவிரதப் போராட்டத்தில் ஈடுபட்டனா்.

இதையடுத்து தனியாா் மண்டபத்தில் நடைபெற்ற ஆலோசனைக் கூட்டத்தில் முதலிபாளையம் பாறைக்குழிக்குள் மீண்டும் குப்பைகளை கொட்ட மாநகராட்சி நிா்வாகம் முயற்சித்தால் குழந்தைகள், கால்நடைகளுடன் நிரந்தரமாக மாநகராட்சி அலுவலகத்தில் குடியேறும் போராட்டத்தை தீவிரமாக நடத்துவோம் என எச்சரிக்கை விடுத்துள்ளனா்.