திருப்பூா் நிலவும் குப்பை பிரச்னை: மாநகராட்சி மேயருக்கு பாஜக கண்டனம்

திருப்பூா்: திருப்பூா் மாநகரில் நிலவும் குப்பை பிரச்னை தொடா்பாக மாநகராட்சி மேயருக்கு பாஜக கண்டனம் தெரிவித்துள்ளது.

இதுதொடர்ரபாக திருப்பூா் வடக்கு மாவட்ட பாஜக தலைவா் கே.சி.எம்.பி.சீனிவாசன் விடுத்துள்ள அறிக்கை:

திருப்பூா் மாநகராட்சியில் பல மாதங்களாக குப்பை அகற்றப்படாமல் நீடிக்கும் நிலையில் பல்வேறு கட்ட போராட்டங்கள், ஆா்ப்பாட்டங்கள் நடைபெற்றன. பொதுமக்கள் மற்றும் அரசியல் கட்சியினா் மீது பல்வேறு பொய் வழக்குகளை போடப்பட்ட பிறகு, கடந்த 10 நாள்களாக குப்பை பிரச்னையில் சிறிதளவு முன்னேற்றம் ஏற்பட்டுள்ளது. பல இடங்களில் மலைபோல் குப்பை குவிந்துகிடந்த இடங்களில் இப்போது சிறிதளவு மட்டுமே காணப்படுகிறது. இதைப் பாா்க்கும்போது கடந்த 48 மாதங்களாக தனியாா் நிறுவனத்துடன் கைகோத்து குப்பையில் மிகப்பெரிய ஊழலை செய்து கொண்டிருந்த மாநகராட்சி நிா்வாகத்தை போராட்டங்கள் மற்றும் ஆா்ப்பாட்டங்கள் மூலமாக செயல்பட வைப்பதற்கு மக்கள் பெரிய விலை கொடுக்க வேண்டியிருந்தது.

குப்பை பிரச்னையில் பாஜக சாா்பில் கடந்த ஜூன் மாதம் முதல் பல்வேறு கட்ட போராட்டங்கள், ஆா்ப்பாட்டங்கள் நடத்தப்பட்டு, கட்சி உறுப்பினா்கள் வழக்குகளுக்கும் உள்ளானாா்கள்.

இந்நிலையில், கடந்த 3 நாள்களுக்கு முன் திருப்பூரில் 2 நாள்களுக்கு மேல் குப்பை இருந்தால் பரிசு மற்றும் அபராதம் விதிக்கப்படும் என்று மாநகராட்சி மேயா் அறிவிப்பு வெளியிட்டுள்ளாா். இப்பிரச்னையில் முழுமையான தீா்வு ஏற்படாத நிலையில், அறிவிப்பை மட்டும் வெளியிடுவதை விட்டு விட்டு களத்தில் இறங்கி பணிபுரிய வேண்டும். பல்வேறு கட்ட போராட்டங்களுக்குப் பிறகு மக்களிடையே விழிப்புணா்வை ஏற்படுத்தி குப்பையை தரம் பிரித்து வீடுகளில் இருந்து வாங்கவும், வணிக நிறுவனங்கள் பொதுமக்கள் பயன்படுத்தும் இடங்களில் குப்பை கொட்டாமலும் இருக்க தற்போது மாநகராட்சி நிா்வாகம் செய்வதுபோல, ஏன் கடந்த 48 மாதங்களாக தனியாா் நிறுவனத்துடன் சோ்ந்து செய்யவில்லை என்பதை மாநகராட்சி மேயா் விளக்க வேண்டும்.

மேலும் பல்க் வேஸ்ட் எனப்படும் அதிகமான குப்பையை நிறுவனங்களிடமிருந்து இப்போது வாங்குவதுபோல, இவ்வளவு மாதங்களாக வாங்காமல் அதற்கான தொகையையும் மக்கள் வரிப்பணத்தில் இருந்து கொடுத்தது ஏன் என்பதையும் மேயா் விளக்க வேண்டும் என்று குறிப்பிட்டுள்ளாா்.