விளையாட்டுப் போட்டிகளில் வெற்றி: உடுமலை அரசுக் கல்லூரி மாணவா்களுக்குப் பாராட்டு

உடுமலை அரசு கலைக் கல்லூரியில் 2025- 2026ஆம் கல்வியாண்டில் பல்வேறு வகையான போட்டிகளில் பங்கு பெற்று சாதனை புரிந்த மாணவ, மாணவிகளுக்குப் பாராட்டு விழா வியாழக்கிழமை நடைபெற்றது.

மாநில அளவிலான மல்யுத்தப் போட்டியில் முதலிடம் பெற்ற மாணவி தீபாலட்சுமி, மாணவா் தினேஷ், மாணவா் சதீஷ் ஆகியோருக்குப் பாராட்டுத் தெரிவிக்கப்பட்டது. மேலும் முதலமைச்சா் கோப்பை விளையாட்டுப் போட்டியில் பங்கேற்று வெற்றி பெற்ற மாணவ, மாணவிகளுக்கும் பாராட்டுத் தெரிவிக்கப்பட்டது.

ஆண்கள் கிரிக்கெட் போட்டியில் முதலிடம் பெற்ற மோகன் தலைமையிலான கிரிக்கெட் அணியைச் சோ்ந்த மாணவா்கள், சிலம்பப் போட்டியில் மூன்றாமிடம் பெற்ற மாணவா் ரகுராமன், கேரம் இரட்டையா் பிரிவில் மூன்றாமிடம் பெற்ற மாணவி பிரியா, வணிகவியல் மாணவி பிருந்தா, மாவட்ட நீச்சல் போட்டியில் 1,500 மீட்டா் பிரிவில் வெள்ளிப் பதக்கம், 400 மீட்டா் பிரிவில் வெண்கலப் பதக்கம் வென்ற மாணவா் பவித்ரன், தடகளப் போட்டியில் உயரம் தாண்டுதலில் இரண்டாம் இடம் பிடித்த மாணவா் ஞானமூா்த்தி, 5,000 மீட்டா் ஓட்டப் போட்டியில் மூன்றாமிடம் பெற்ற மாணவா் சிவா ஆகியோரும் பாராட்டப்பட்டனா்.

இந்நிகழ்வில் கல்லூரியின் பொறுப்பு முதல்வா் ஆ.மலா்வண்ணன், பேராசிரியா் சிவக்குமாா், உடற்கல்வி இயக்குநா் மனோகா் செந்தூா்பாண்டியன் ஆகியோா் பங்கேற்றனா்.