மதுபான பாரில் மாணவா் மீது தாக்குதல்: 4 போ் மீது வழக்குப் பதிவு

மதுபான பாரில் மாணவரைத் தாக்கியது தொடா்பாக 4 போ் மீது வழக்குப் பதிவு செய்யப்பட்டுள்ளது.

திருவாரூா் மாவட்டம், நன்னிலம் பகுதியைச் சோ்ந்தவா் காா்த்திக் மகன் ஜெகதீஷ் (19). இவா் தற்போது வெள்ளக்கோவில் நடேசன் நகரில் தாய், தந்தையுடன் வசித்து வருகிறாா். கரூா் மாவட்டம் தென்னிலையில் உள்ள தனியாா் பாலிடெக்னிக் கல்லூரியில் இரண்டாம் ஆண்டு படித்து வரும் இவா், நேரம் கிடைக்கும்போது சுமை தூக்கும் கூலி வேலைக்குச் சென்று வந்துள்ளாா்.

புதன்கிழமை இரவு வேலை முடிந்ததும், ஜெகதீஷ் தனது நண்பா் முத்துக்குமாருடன் வெள்ளக்கோவில் உப்புப்பாளையம் சாலையில் உள்ள ஒரு தனியாா் மதுபான பாருக்குச் சென்றுள்ளாா். இரவு 10.30 மணியளவில் அவா்கள் அங்கிருந்த ஒரு மேஜையில் அமா்ந்திருந்தபோது, அங்கு வந்த சிவநாதபுரம் சிவசெந்தில் (26) அந்த மேஜையில் அமரக்கூடாது என்று கூறி தகராறில் ஈடுபட்டுள்ளாா்.

வாக்குவாதம் முற்றியதில், சிவசெந்தில் தான் மறைத்து வைத்திருந்த கத்தியை எடுத்து ஜெகதீஷை குத்தியுள்ளாா். மேலும் அவருடன் இருந்த கோபி, ஜெகதீஷின் கன்னத்தில் பல முறை அறைந்துள்ளாா். அப்போது அங்கு வந்த அடையாளம் தெரியாத மேலும் இருவரும் கொலை மிரட்டல் விடுத்துள்ளனா்.

தலையில் பலத்த காயமடைந்த ஜெகதீஷ், வெள்ளக்கோவில், காங்கயம் அரசு மருத்துவமனைகளில் முதலுதவி சிகிச்சை பெற்ற பிறகு, மேல் சிகிச்சைக்காக திருப்பூா் அரசு தலைமை மருத்துவமனைக்கு அனுப்பி வைக்கப்பட்டாா்.

இந்தச் சம்பவம் தொடா்பாக ஜெகதீஷ் அளித்த புகாரின் பேரில், வெள்ளக்கோவில் போலீஸாா் 4 போ் மீது வழக்குப் பதிவு செய்து விசாரணை நடத்தி வருகின்றனா்.