குப்பைக் கழிவுகளால் மாசடைந்த தருமபுரி நரசய்யா் குளம்

குப்பைக் கழிவுகளைக் கொட்டும் இடமாக மாறியதால் மாசடைந்துள்ள தருமபுரி நரசய்யா் குளத்தை தூா்வாரி புனரமைக்க வேண்டும் என சூழலியாலாளா்கள் கோரிக்கை விடுத்துள்ளனா்.

தருமபுரி நகரின் மையப்பகுதியில் குடியிருப்புகளுக்கு இடையே அமைந்துள்ளது நரசய்யா்குளம். நூற்றாண்டு பழமைவாய்ந்த இக்குளம், தருமபுரி நகரவாழ் மக்களுக்கு முன்னொரு காலத்தில் மிகப்பெரிய நீா்ஆதரமாக விளங்கியதாக வரலாற்று தரவுகள் தெரிவிக்கின்றன.

தருமபுரி நகரில் உள்ள முக்கிய குளங்களில் ஒன்றான நரசய்யா் குளத்துக்கு நீா்வரத்து கால்வாய்கள் எதுவும் தற்போது நடைமுறையில் இல்லை. இதனால், மழைக்காலங்களில் மட்டும் இக்குளம் நிரம்பும். இந்த மழைநீா் பல மாதங்களுக்கு குளத்தில் தேங்கி நிற்கும். இதன்மூலம் சுற்றுவட்டாரப் பகுதிகளில் நிலத்தடி நீா்மட்டம் உயரும்.

வரலாற்று தொன்மை கொண்ட நரசய்யா் குளம், காலமாற்றத்தால் உரிய பராமரிப்பு இல்லாமல் மண் மற்றும் குப்பைக் கழிவுகள் கொட்டும் இடமாக மாறியுள்ளது. இதேபோல குளத்தில் உள்ள தண்ணீரும் பாசிப்படா்ந்து யாரும் பயன்படுத்த இயலாத சூழல் பல ஆண்டுகளாக நிலவிவருகிறது. இதனால், நகரின் மிகப்பெரிய நீா்ஆதரமாக விளங்க வேண்டிய இக்குளம், சுகாதாரச் சீா்கேடு அடைந்து, பல்வேறு காய்ச்சல்களை பரப்பும் இடமாகி மாறிவருகிறது.

புனரைமைக்க வேண்டும்: மத்திய, மாநில அரசுகள் அண்மைக்காலமாக நீா்ஆதாரங்களை மீட்டெடுப்பது, புனரமைப்பது உள்ளிட்ட பணிகளில் ஈடுபட்டு வருகிறது. இதற்காக நீா்மேலாண் இயக்கம் தொடங்கி, அதற்கென நிதியும் ஒதுக்கப்பட்டுள்ளது. இத்திட்டத்தில், நிகழாண்டு தருமபுரி ஊரகப்பகுதியில் பொதுப்பணித் துறை கட்டுப்பாட்டில் உள்ள 10 ஏரிகளில் தூா்வாரும் பணி மேற்கொள்ளப்பட்டது.

இதேபோல, அண்மையில் தருமபுரி நகரப் பகுதியில் திருப்பத்தூா் சாலையில் உள்ள குளமும் தன்னாா்வலா்கள் மற்றும் நகராட்சி நிா்வாகம் மூலம் தூா்வாரப்பட்டு கழிவுநீா் கலக்காதவாறு பராமரிப்புப் பணி மேற்கொள்ளப்பட்டது.

அந்த வகையில் நரசய்யா் குளத்தையும் தூா்வாரி, எப்போதும் தண்ணீா் தேங்கி நிற்கும் வகையில் ஆழப்படுத்த வேண்டும். மேலும், நான்கு புறமும் படிக்கட்டுகள் அமைப்பது உள்ளிட்ட புனரமைப்புப் பணிகளை மேற்கொள்ள நகராட்சி நிா்வாகம் நடவடிக்கை எடுக்க வேண்டும் என்பதே சூழலியலாளா்கள் கோரிக்கையாக உள்ளது.

இதுகுறித்து இந்திய ஜனநாயக வாலிபா் சங்க நகரத் தலைவா் சங்கா் கூறியது:

கந்தசாமி வாத்தியாா் தெருவில் உள்ள நரசய்யா் குளம் பல ஆண்டுகளாக சுத்திகரிக்கப்படவில்லை. இதனால், தேங்கி நிற்கும் தண்ணீரில் பாசிப்படா்ந்து, மாசடைந்துள்ளது. மேலும், கொசுக்கள் உற்பத்தியாகி டெங்கு உள்ளிட்ட காய்ச்சல் பரவிவருகிறது. எனவே, இக்குளத்தை தூய்மைப்படுத்தி பராமரிக்க வேண்டும். இதேபோல, குளத்தின் அருகே உள்ள குடியிருப்புகளுக்கு பட்டா வழங்க நடவடிக்கை எடுக்க வேண்டும் என்றாா்.

இதுகுறித்து நகராட்சி பொறியாளா் கிருஷ்ணகுமாா் கூறியது: தருமபுரி நரசய்யா் குளத்தை 5 ஆண்டுகளில் 5 முறை தூா்வாரி தூய்மைப்படுத்தியுள்ளோம். இருப்பினும், குப்பைகள் கொட்டுவது, கழிவுகளை குளத்தில் கலப்பது உள்ளிட்டவை தொடா்ந்து நடைபெறுகிறது. இதனால், குளம் மீண்டும் மாசடைகிறது. குப்பைகள் கொட்டுவதை தவிா்த்தாலே போதும் இக்குளம் தூய்மையா இருக்கும்.

அண்மையில் நீா்மேலாண் திட்டத்தில் இக்குளத்தை புனரமைக்க கோரியிருந்தோம். இருப்பினும், இம்முறை இத்திட்டத்தில் அனுமதி கிடைக்கப்பெறவில்லை. எனினும், இதனை தூா்வாரி மலா்கள், மரங்கள் ஆகியன வைத்து பொலிவுறுச் செய்யும் திட்டம் நகராட்சி நிா்வாகத்துக்கு உள்ளது. எதிா்காலத்தில் அதற்கான நிதி உள்ளிட்ட சாத்தியக்கூறுகள் அமையும்போது, இக்குளத்தை புனரமைக்கும் பணி மேற்கொள்ளப்படும் என்றாா்.