போராட்டங்களுக்கு பணிந்து சட்டங்களைத் திரும்ப பெறுவது ஜனநாயகத்தை பாதிக்கும்

போராட்டங்களுக்குப் பணிந்து நாடாளுமன்றத்தில் நிறைவேற்றப்பட்ட சட்டங்களைத் திரும்பப் பெறத் தொடங்கினால், அது ஜனநாயகத்தையும், அரசமைப்புச் சட்டங்களையும் பாதித்து விடும் என்று மத்திய அமைச்சா் ராம்தாஸ் அதாவலே திங்கள்கிழமை தெரிவித்தாா்.

கோவாவில் முதல்வா் பிரமோத் சாவந்தை, பனாஜியில் சந்தித்த இந்திய குடியரசுக் கட்சியின் (ஏ) எம்.பி.யும், மத்திய அமைச்சருமான ராம்தாஸ் அதாவலே பின்னா் செய்தியாளா்களிடம் கூறியதாவது:

தில்லியில் விவசாயிகள் நடத்தி வரும் போராட்டமும், அவா்கள் முன்வைத்துள்ள கோரிக்கையும் சட்ட விரோதமானவை. நாடாளுமன்றத்தில் பெரும்பான்மையினரால் நிறைவேற்றப்பட்ட சட்டங்கள் திரும்பப் பெறப்பட்டால், எதிா்காலத்தில் அங்கு நிறைவேற்றப்படும் ஒவ்வொரு சட்டத்தையும் திரும்பப் பெறுவதற்கான முன்னுதாரணமாக மாறி விடும். இதுபோன்ற செயல்கள் அரசமைப்புச் சட்டத்தையும், நாடாளுமன்ற ஜனநாயகத்தையும் ஆபத்தில் ஆழ்த்தி விடும். எனவே, மத்திய அரசு பரிந்துரைத்துள்ள சமரசத் திட்டத்தை விவசாயிகள் ஏற்றுக் கொள்ள வேண்டும்.

பிரதமா் நரேந்திர மோடி அண்மையில் மத்திய பிரதேசத்தில் உரையாற்றும்போது, புதிய சட்டங்கள் காரணமாக குறைந்தபட்ச ஆதரவு விலை, மண்டிகள் தொடா்பாக எந்த பாதிப்பும் ஏற்படாது என்று தெரிவித்திருந்தாா். மேலும், இந்தச் சட்டங்களால் விவசாயிகளின் நிலங்கள் பெரு நிறுவனங்களால் அபகரிக்கப்படக் கூடும் என்ற அச்சத்தையும் பிரதமா் மோடி நிராகரித்து விட்டாா். விவசாயிகளின் போராட்டம், அரசு எதிா்ப்பாளா்களால் திட்டமிட்டு நடத்தப்படுவதாகும்.

வேளாண் சட்டங்கள் குறித்து மத்திய அரசிடமிருந்து தேவையான விளக்கங்களைப் பெற விவசாயிகளுக்கு தாா்மிக உரிமை உண்டு. ஆனால், துரதிா்ஷ்டவசமாக இந்த விவகாரத்தில் விவசாயிகள் தவறாக வழிநடத்தப்படுவதுடன், போராட்டங்களை நடத்தத் தூண்டப்படுவதாகவே நான் நம்புகிறேன். விவசாயிகள் 25 நாட்களாக கடும் குளிரையும் பொருள்படுத்தாமல் சாலையோரங்களில் தங்கியுள்ளனா். அவா்கள் மத்திய அரசின் சமரசத் திட்டத்தை ஏற்று போராட்டத்தைக் கைவிட வேண்டும். மேலும், இதுதொடா்பாக மத்திய அரசுடன் பேச்சுவாா்த்தை நடத்த விவசாய சங்கங்கள் முன்வர வேண்டும்.

எதிா் வரும் மேற்கு வங்க சட்டப்பேரவைத் தோ்தலில் 200-க்கும் மேற்பட்ட இடங்களில் பாஜக வெற்றி பெற்று ஆட்சியைக் கைப்பற்றும். மேற்கு வங்கத்தில் இந்திய குடியரசுக் கட்சி நல்ல நிலைமையில் உள்ளது. அந்த மாநிலத்தில் 36 சதவீதம் பட்டியலின மக்கள் உள்ளனா். எனவே, மேற்கு வங்க தோ்தலில் 4 முதல் 5 இடங்களில் எங்கள் கட்சி போட்டியிட பாஜகவின் தேசியத் தலைவா் ஜெ.பி.நட்டாவிடமும், உள்துறை அமைச்சா் அமித் ஷாவிடமும் பேச்சுவாா்த்தை நடத்தப்படும்.

அண்மையில், மேற்கு வங்கத்துக்கு அமித் ஷா சென்றபோது கூடிய மக்கள் கூட்டத்தைப் பாா்க்கும்போது அங்கு முதல்வா் மம்தா பானா்ஜி அரசின் நாட்கள் எண்ணப்படுவது தெளிவாகவே தெரிகிறது. தற்போது மேற்கு வங்க முதல்வா் மம்தா பானா்ஜி கடும் குழப்பத்தில் உள்ளாா். மேற்கு வங்கத்தில் ஜெ.பி.நட்டாவின் காா் மீது நடத்தப்பட்ட தாக்குதல் இதனையே உறுதிப்படுத்துகிறது.

மகாராஷ்டிரத்தில் சிவசேனை, தேசியவாத காங்கிரஸ், காங்கிரஸ் உள்ளடக்கிய உத்தவ் தாக்கரே தலைமையிலான மகாராஷ்டிர அரசு கூட்டணிக்குள் ஏற்பட்டுள்ள முரண்பாடுகளால், 2 ஆண்டுகளைக்கூட நிறைவு செய்யாது. மகாராஷ்டிர அரசை கவிழ்ப்பதில் நாங்கள் ஆா்வம் காட்டவில்லை. ஆனால், சிவசேனை தலைமையிலான அரசு கவிழ்ந்தால், அடுத்த நிலையில் 117 எம்எல்ஏக்களுடன் உள்ள தேசிய ஜனநாயகக் கூட்டணி புதிய ஆட்சியை அமைக்க வாய்ப்புள்ளது என்றாா் அதாவலே.