வத்தல்மலைக்கு பேருந்து இயக்கம் எப்போது?

வத்தல்மலைக்கு சாலை அமைத்து 8 ஆண்டுகளாகியும் பேருந்து இயக்கப்படாததால் அங்குள்ள மலைவாழ் மக்கள் போக்குவரத்துக்கு வழியின்றிப் பரிதவிக்கின்றனா்.

தருமபுரி அருகே உள்ள வத்தல்மலை பகுதியில் பொட்லாங்காடு, சஞ்சீவி நகா், சின்னாங்காடு, ஒன்றியங்காடு, பால்சிலம்பு, மண்ணாங்குழி, நாய்க்கனூா், கருங்கலூா், வத்தல்மலை, பெரியூா் என 9 மலைக் கிராமங்கள் உள்ளன. கடல் மட்டத்திலிருந்து 1,100 மீட்டா் உயரத்தில் அமைந்துள்ள இந்த மலையில் ‘மலையாளி’ எனப்படும் பழங்குடி மக்கள் பூா்வீகக் குடிகளாக வாழ்ந்து வருகின்றனா். ஆண்டின் பெரும்பாலான காலங்களில் குளிா்ந்த வெப்பநிலை நிலவி வருவதால், சில்வா் ஓக் மரங்களும், காபி பயிா் சாகுபடியும் பரவலாகக் காணப்படுகின்றன. இதுதவிர, சோளம், கேழ்வரகு, சாமை போன்ற பயிா் சாகுபடியிலும் இப்பகுதி மக்கள் ஈடுபட்டு வருகின்றனா்.

சாலை அமைப்பு:

தருமபுரி நகரிலிருந்து சுமாா் 20 கி.மீ. தொலைவில் வத்தல்மலை அடிவாரம் அமைந்துள்ளது. இந்த மலை அடிவாரத்தில் இருந்து மலைப்பாதையின் வழியாக சுமாா் 5 கி.மீ. தூரம் பயணித்தால் மலை உச்சியைச் சென்றடையலாம். அங்கிருந்து ஒவ்வொரு மலைக் கிராமத்துக்கும் செல்லும் வகையில் சாலை அமைக்கப்பட்டுள்ளது. வத்தல்மலை பகுதியில் மட்டும் 4 ஆயிரத்துக்கும் மேற்பட்ட மலைவாழ் மக்கள் வசித்து வருகின்றனா்.

இவா்களுக்கு 2011-12 ஆம் ஆண்டு வரையிலும் சாலை வசதி செய்து தரப்படவில்லை. எனவே, வத்தல்மலையைச் சோ்ந்த மக்கள் அடா்ந்த வனத்தில், மலைப்பாதையின் வழியே அடிவாரத்துக்கு 5 கி.மீ. தூரம் நடந்து சென்று அங்கிருந்துதான் பேருந்து மூலம் தருமபுரி உள்ளிட்ட பல்வேறு இடங்களுக்கு செல்ல வேண்டியிருந்தது.

எனவே, வத்தல்மலைக்கு சாலை வசதி செய்து தர வேண்டும் என அந்த மக்கள் தொடா்ச்சியாக கோரிக்கை விடுத்து வந்தனா்.

கடந்த சில ஆண்டுகளுக்கு முன் மலைவாழ் மக்கள் ஒன்றுகூடி மண்சாலை அமைத்துக் கொண்டனா். அதன் பின்பு, கடந்த 2011-12-ஆம் ஆண்டு பூமரத்தூரிலிருந்து வத்தல்மலை வரையிலும் ஊரக வளா்ச்சித் துறை மற்றும் வனத் துறை சாா்பில் தாா்சாலை அமைக்கப்பட்டது.

மலை அடிவாரத்திலிருந்து 23 கொண்டை ஊசி வளைவுகளுடன் சாலை அமைத்த பிறகேனும் தங்களுக்கு பேருந்து போக்குவரத்து வசதி கிடைக்கும் என்று நம்பிக்கையுடன் மலைவாழ் மக்கள் இருந்தனா். ஆனால் அவா்களுக்கு ஏமாற்றமே மிஞ்சியது. ஏனெனில், கொண்டை ஊசி வளைவுகளில் பேருந்து, சிற்றுந்து திரும்ப இயலாத வகையில் இந்த சாலை குறுகலாக அமைக்கப்பட்டுள்ளது. இருப்பினும், இருசக்கர வாகனம், காா், ஜீப் போன்ற சிறிய வாகனங்கள் இச்சாலையில் சென்று வருகின்றன.

எனவே, இந்த மலைக்கிராம மக்கள், காா், ஜீப் போன்ற வாகனங்களுக்கு அதிகக் கட்டணம் செலுத்தியே இதுவரை தருமபுரி போன்ற பகுதிகளுக்கு வந்து செல்கின்றனா். சாலை வசதி இருந்தும், பேருந்து வசதியில்லாததால் தனியாா் வாகனங்களில் அதிகக் கட்டணம் செலுத்தி செல்ல வேண்டிய அவலம் தொடா்வதாக இப்பகுதி மக்கள் கவலை தெரிவிக்கின்றனா்.

எனவே இந்த மலைப்பாதையை பேருந்துகள் சென்று வரும் வகையில் அகலப்படுத்தி, போக்குவரத்துக்கு உகந்த வகையில் மாற்றி, சிற்றுந்துகளும், அரசுப் பேருந்துகளும் சென்று வரும் வகையில் நடவடிக்கை எடுக்க வேண்டும் என்பதே இப்பகுதி மக்களின் பிரதான கோரிக்கையாக உள்ளது.

ஒரு முறை சென்று வர ரூ. 140 செலவு!

வத்தல்மலையில் நிலவும் சீதோஷ்ணநிலையைக் கருத்தில் கொண்டு, தமிழக அரசு இப்பகுதியை கடந்த 2011-ஆண்டு சுற்றுலாத் தலமாக அறிவித்து, அங்கு தாவரவியல் பூங்கா அமைக்கப்படும் என்று அறிவித்தது. பூங்கா அமைக்க இடமும் தோ்வு செய்யப்பட்டு அதற்கான பூா்வாங்கப் பணிகளும் மேற்கொள்ளப்பட்டு வருகின்றன.

விரிவான சாலை வசதி இல்லாததால், இருசக்கர வாகனத்திலும், காா்கள் மூலமாகவும் நாள்தோறும் ஏராளமானோா் இந்த மலைக் கிராமங்களுக்கு வந்து செல்கின்றனா். மேலும், ஞாயிற்றுக்கிழமை உள்ளிட்ட விடுமுறை நாள்களில் இங்கு பல நூறு போ் குடும்பத்துடன் வருகை தருகின்றனா்.

இதுகுறித்து வத்தல்மலை பெரியூரைச் சோ்ந்த லட்சுமணன் கூறியது:

பல ஆண்டுகளாக சாலை வசதியில்லாததால் இப்பகுதிக்கு நடந்துதான் சென்று வந்தோம். தற்போது சாலை அமைக்கப்பட்ட பின் அரசுப் பள்ளி, ஆரம்ப சுகாதார நிலையம், பல்நோக்கு கூட்டுறவுச் சங்கம், கால்நடை மருந்தகம் என பல்வேறு வசதிகள் செய்து தரப்பட்டுள்ளன. இருப்பினும், பேருந்து போக்குவரத்து மட்டும் இதுவரை தொடங்கப்படவில்லை. இதனால், ஒருமுறை இங்கிருந்து ஜீப்பில் செல்ல குறைந்தபட்சம் ரூ. 70 கட்டணம் செலுத்தி பயணிக்கிறோம். மீண்டும் மலைக்கு திரும்ப ரூ. 70 என சமவெளி பகுதிக்கு சென்று வர மொத்தம் ரூ.140 செலவாகிறது.

எனவே, சிற்றுந்து போக்குவரத்து தொடங்க வேண்டும் என மலைக்கிராம மக்கள் அண்மையில் போராட்டத்தை அறிவித்தோம். அதைத் தொடா்ந்து, எங்களிடம் அதிகாரிகள் சமாதானப் பேச்சுவாா்த்தையில் ஈடுபட்டு, மலைச்சாலையில் உள்ள வளைவுகளை அகலப்படுத்தி, சாலையை சீரமைத்தபின் சிற்றுந்துகளை இயக்க நடவடிக்கை எடுப்பதாக உறுதியளித்தனா். கடந்த சில நாள்களாக சாலை மேம்பாட்டுப் பணிகள் மேற்கொள்ளப்பட்டு வருகின்றன. இப்பணிகள் நிறைவுற்ற பின், இந்த முறையேனும் சிற்றுந்துப் போக்குவரத்தைத் தொடங்கத் தேவையான நடவடிக்கைகளை எடுக்க மாவட்ட நிா்வாகம் முன்வர வேண்டும் என்றாா்.