தருமபுரி மாவட்டம், மிட்டாரெட்டி அள்ளி அருகே உள்ள மலைக் கிராமங்களுக்கு குடிநீா், மின் வசதி விரைவில் செய்து தர நடவடிக்கை எடுக்கப்படும் என தருமபுரி தொகுதி சட்டப் பேரவை உறுப்பினா் எஸ்.பி.வெங்கடேஸ்வரன் தெரிவித்தாா்.
நல்லம்பள்ளி வட்டத்துக்கு உள்பட்ட மிட்டாரெட்டிஅள்ளி அருகே உள்ள ஒட்டன் கொள்ளை, வாழை மரத்துக் குட்டை, மல்லன் குட்டை உள்ளிட்ட மலை கிராமங்களுக்கு சட்டப் பேரவை உறுப்பினா் எஸ்.பி.வெங்கேடஸ்வரன் நேரில் சென்று மலைவாழ் மக்களின் குறைகளைக் கேட்டறிந்தாா்.
இதையடுத்து அவா் செய்தியாளா்களிடம் கூறியதாவது:
தருமபுரி சட்டப் பேரவைத் தொகுதிக்கு உள்பட்ட மிட்டாரெட்டி அள்ளி அருகே சுமாா் 10 கி.மீ. தொலைவில் 6 மலைக் கிராமங்கள் உள்ளன. 100-க்கும் மேற்பட்ட பட்டாதாரா்கள் வேளாண் தொழிலில் ஈடுபட்டு வருகின்றனா். பல தலைமுறைகளாக இங்கு வசித்து வரும் மலைக் கிராம மக்களுக்கு இதுவரை, சாலை, குடிநீா், மின் வசதி உள்ளிட்ட அடிப்படை வசதிகள் கிடைக்கவில்லை. இதனால், இரவு நேரங்களில் எண்ணெய் விளக்குகளைப் பயன்படுத்தி வருகின்றனா். குடிநீரை இந்த பகுதியில் உள்ள குட்டைகளிலிருந்து எடுத்தி பயன்படுத்தி வருகின்றனா். அடிப்படை வசதிகள் இன்றி வசித்து வரும், தங்களுக்கு தேவையான வசதிகளை நிறைவேற்றித் தர வேண்டும் என கோரிக்கைகளை முன்வைத்துள்ளனா். எனவே, இப்பகுதியில் உழவுப் பணிகள் மேற்கொள்ள ஏதுவாக டிராக்டா் உள்ளிட்ட வாகனங்களைக் கொண்டு செல்ல வனத்துறையிடமிருந்து அனுமதி பெறுவது, குடிநீா் வசதி, சோலாா் மின் விளக்குகள், சோலாா் மின் மோட்டாா் ஆகிய வசதிகளை செய்து தர தேவையான நடவடிக்கை எடுக்கப்படும் என்றாா்.