தருமபுரி மாவட்டம், பாலக்கோடு அருகே கும்மனூரில் இருளா்கள் 52 பேருக்கு பட்டா, 12 பேருக்கு குடும்ப அட்டைகள் வழங்கப்பட்டன.
தருமபுரி மாவட்டம், பாலக்கோடு வட்டம் கும்மனூரில் புதன்கிழமை இருளா்களுக்கு பட்டா, குடும்ப அட்டைகள் வழங்கும் நிகழ்ச்சி நடைபெற்றது.
நிகழ்ச்சிக்குத் தலைமை வகித்து தருமபுரி மாவட்ட ஆட்சியா் ச.திவ்யதா்சினி, இருளா்கள் 52 பேருக்கு பட்டா, 12 பேருக்கு மின்னணு குடும்ப அட்டைகளும், தமிழக அரசின் கரோனா பொதுமுடக்கக் கால நிவாரணமாக ரூ. 4 ஆயிரம், மளிகைப் பொருள்கள் ஆகியவற்றை வழங்கிப் பேசியதாவது:
கும்மனூரில் உள்ள இருளா் இன மக்களின் நீண்ட நாள் கோரிக்கையை நிறைவேற்ற தமிழக அரசு உத்தரவு பிறப்பித்தது. அதன்பேரில் இங்குள்ள 52 பேருக்கு பட்டாக்களும், 12 பேருக்கு புதிதாக குடும்ப அட்டைகள் மற்றும் நிவாரண நிதி, மளிகை பொருள்கள் வழங்கப்பட்டுள்ளன. வீட்டு மனைப் பட்டா கிடைக்கப் பெற்ற 52 குடும்பங்களுக்கும் விரைவில் தமிழக அரசு சாா்பில் வீடு கட்ட வழிவகை செய்யப்பட்டுள்ளது.
குடிநீா், தெருவிளக்கு, சாலை உள்ளிட்ட அடிப்படை வசதிகளும் ஏற்படுத்தி தரப்படும். குடும்ப அட்டை இல்லாத தகுதி வாய்ந்த அனைவருக்கும் முதலில் ஆதாா் அட்டை பதிவு செய்து வழங்கிட நடவடிக்கை மேற்கொள்ளப்பட்டுள்ளது. ஆதாா் அட்டை கிடைக்கப் பெற்றவுடன் விரைவில் அனைவருக்கும் குடும்ப அட்டை வழங்கப்படும்.
இப்பகுதி மக்களின் கோரிக்கையான இருளா் இன சாதிச் சான்றிதழ், முதியோா் உதவித்தொகை உள்ளிட்ட பல்வேறு கோரிக்கைகளைத் தெரிவிக்க ஏதுவாக இப்பகுதியிலேயே வருவாய்த் துறை சாா்பில் முகாம் வியாழக்கிழமை நடைபெறும். இம்முகாமில் உங்கள் கோரிக்கை மனுக்களை அளித்து பயன்பெறலாம் என்றாா்.
இதில் கோட்டாட்சியா் (பொ) தேன்மொழி, கூட்டுறவு சங்கங்களின் இணை பதிவாளா் ராமதாஸ், மாவட்ட வழங்கல் அலுவலா் ஜெயக்குமாா், பாலக்கோடு வட்டாட்சியா் அசோக்குமாா், வட்ட வழங்கல் அலுவலா் ஜெகதீசன், வட்டார வளா்ச்சி அலுவலா்கள் ரவி, ரவிச்சந்திரன் ஆகியோா் கலந்து கொண்டனா்.
தினமணி செய்திமடலைப் பெற... Newsletter
தினமணி'யை வாட்ஸ்ஆப் சேனலில் பின்தொடர... WhatsApp
தினமணியைத் தொடர: Facebook, Twitter, Instagram, Youtube, Telegram, Threads
உடனுக்குடன் செய்திகளை அறிய தினமணி App பதிவிறக்கம் செய்யவும்.