ஒகேனக்கல் கூட்டு குடிநீா் திட்ட இரண்டாம் கட்ட பணி நிறைவடைந்ததும் கிராமங்களில் கட்டி முடிக்கப்பட்ட புதிய மேல்நிலை நீா்த்தேக்கத் தொட்டிகள் மூலம் குடிநீா் விநியோகம் செய்யப்படும் என கிராம சபைக் கூட்டத்தில் மாவட்ட ஆட்சியா் ச.திவ்யதா்சினி பேசினாா்.
தருமபுரி மாவட்டம், பென்னாகரம் அருகே மாங்கரை ஊராட்சியில் நல்லாம்பட்டி அரசு தொடக்கப் பள்ளியில் நடைபெற்ற மே தின கிராம சபைக் கூட்டத்துக்கு ஊராட்சிமன்றத் தலைவா் மஞ்சுளா செந்தில் தலைமை வகித்தாா்.
பென்னாகரம் ஒன்றிய குழுத் தலைவா் கவிதா ராமகிருஷ்ணன் முன்னிலை வகித்தாா். கூட்டத்தில் ஊராட்சி செயலாளா் தீா்மானங்களை முன்மொழிந்தாா். கூட்டத்தில் சிறப்பு அழைப்பாளராகப் பங்கேற்ற மாவட்ட ஆட்சியா் ச.திவ்யதா்சினி பேசியதாவது:
மாங்கரை ஊராட்சியில் உள்ள ஏரிகள் தூா்வாரப்பட்டு கரைகள், சாலை ஓரங்களில் மரக்கன்றுகள் நடப்பட்டு குடில் அமைக்க வேண்டும். ஊராட்சியில் உள்ள ஏரிகள், விவசாய ஆக்கிரமிப்புகள் முறையான அறிவிப்பை வெளியிட்டு அகற்றப்படும்.
பழுதடைந்த அங்கன்வாடி மையங்கள், கழிப்பிடங்கள் 15-ஆவது மானியக் குழு நிதியின் மூலம் சரி செய்யப்படும். மாங்கரை ஊராட்சி நல்லாம்பட்டி பகுதியில் உள்ள தொடக்கப் பள்ளி மற்றும் நடுநிலைப் பள்ளியில் கழிப்பிட வசதி, வகுப்பறைகள் கட்டித் தரப்படும்.
குழந்தைகளுக்கு எள் மிட்டாய்...
பென்னாகரம் வட்டாரத்தில் ஊட்டச்சத்து குறைபாடு உள்ள குழந்தைகள் கண்டறியப்பட்டுள்ளனா். மாங்கரை ஊராட்சியில் 19 குழந்தைகளுக்கு ஊட்டச்சத்து குறைபாடுகள் உள்ளதால் தினசரி அங்கன்வாடி மையத்தில் எள் மிட்டாய் வழங்கப்படுகிறது. ஊட்டச்சத்து குறைபாடு உள்ள குழந்தைகளின் பெற்றோா்களுக்கு ஆலோசனை வழங்கப்படுகிறது.
எள் மிட்டாய் வழங்குவதன் மூலம் ஆறு மாதத்தில் ரத்தசோகை இல்லாத நிலையை குழந்தைகள் அடைய நடவடிக்கை எடுக்க வேண்டும்.
கிராமங்களில் உள்ள வீடுகள்தோறும் வெளியேற்றப்படும் குப்பைகளைத் தரம் பிரித்து வழங்க வேண்டும். மஞ்சள் பைகளை பயன்படுத்த அரசு அறிவித்து வரும் நிலையில் நெகிழிப் பைகளின் பயன்பாடு குறைவாக உள்ள கிராமங்களைத் தோ்வு செய்து முன்மாதிரி கிராம விருதுகள் வழங்கப்பட உள்ளன.
முன்மாதிரி கிராம விருதுக்குத் தோ்வு:
கிராம ஊராட்சிகளில் வீடுகள்தோறும் அரசின் சாா்பில் அமைக்கப்பட்டுள்ள கழிப்பிடங்களை பயன்படுத்தி, திறந்தவெளி கழிப்பிடம் இல்லாத ஊராட்சியாக இருக்கும் பட்சத்தில் மாவட்டம் தோறும் ஒரு கிராம ஊராட்சித் தோ்வு செய்யப்பட்டு, தமிழக அரசின் சாா்பில் ரூ. 7.5 லட்சம் நிதி மற்றும் முன்மாதிரி கிராம விருது வரும் ஆகஸ்ட் 15-ஆம் தேதி தமிழக அரசின் சாா்பில் வழங்கப்படுகிறது.
மாங்கரை ஊராட்சியில் மொத்தம் 1,400 வீடுகள் உள்ள நிலையில் மூன்றில் ஒரு பங்கு வீடுகளுக்கு குடிநீா் இணைப்பு வழங்கப்பட்டுள்ளது. இதில் 1,030 வீடுகளுக்கு ‘ஜல்ஜீவன்’ திட்டத்தின் மூலம் குடிநீா் இணைப்பு வழங்கப்பட உள்ளது.
கிராமங்களில் கட்டப்பட்டு உள்ள மேல்நிலை நீா்த்தேக்கத் தொட்டிக்கு முதலாவது கூட்டு குடிநீா் திட்டத்தின் மூலம் குடிநீா் விநியோகிக்க இயலாது. தற்போது தமிழக அரசின் சாா்பில் இரண்டாம் கட்ட ஒகேனக்கல் கூட்டு குடிநீா் திட்டப் பணிகள் மேற்கொள்ளப்பட உள்ளதால் இரண்டு வருடங்களில் அத்திட்டம் நிறைவு பெறும்.
அதன்பிறகு அத்திட்டத்தின் கீழ் கிராம ஊராட்சிகளில் புதிதாகக் கட்டப்பட்டுள்ள மேல்நிலை நீா்த்தேக்கத் தொட்டி மூலம் ஒகேனக்கல் கூட்டுக் குடிநீா் வழங்க நடவடிக்கை எடுக்கப்படும் என்றாா்.
கூட்டத்தில் கிராம ஊராட்சிகள் உதவி இயக்குநா் சீனிவாசன், பென்னாகரம் வட்டார வளா்ச்சி அலுவலா்கள் வடிவேலு, ரங்கநாதன், வட்டாட்சியா் அசோக்குமாா், பென்னாகரம் வேளாண்மை அலுவலா் புவனேஸ்வரி, வட்டார மருத்துவ அலுவலா் ஜெயசந்திரபாபு, அரசு அலுவலா்கள் கலந்து கொண்டனா்.