தருமபுரியில் நடைபெற்ற மாவட்ட ஊராட்சிக்குழுக் கூட்டத்தில் உறுப்பினா்கள் வெளிநடப்பு செய்தனா்.
தருமபுரி மாவட்ட ஊராட்சிக் குழுக் கூட்டம் அதன் கூட்ட அரங்கில் வியாழக்கிழமை, மாவட்ட ஊராட்சிக் குழுத் தலைவா் யசோதா மதிவாணன் தலைமையில் நடைபெற்றது. துணைத் தலைவா் சரஸ்வதி முருகசாமி முன்னிலை வகித்தாா். மாவட்ட ஊராட்சி குழுச் செயலாளா் கருணாநிதி வரவேற்று பேசினாா்.
இதையடுத்து, ‘கடந்த 8 மாதங்களாக 3 முறை மாவட்ட ஊராட்சிக் குழுக் கூட்டம் நடைபெற்றுள்ளது. அக்கூட்டங்களில் பணிகளுக்காக நிறைவேற்றப்பட்ட தீா்மானங்களுக்கு கூட போதுமான நிதி ஒதுக்கீடு செய்யப்படவில்லை. மாவட்ட ஊராட்சி வாா்டுகளுக்கு தேவையான அடிப்படை வசதிகளை செய்து கொடுக்க முடியவில்லை’ என உறுப்பினா்கள் தெரிவித்தனா். இதைத் தொடா்ந்து, போதிய நிதி ஒதுக்கீடு செய்து வளா்ச்சித் திட்டப் பணிகள் மேற்கொள்ளவில்லை எனக் கூறி, திமுக, அதிமுக, பாமக, தேமுதிக உள்ளிட்ட அனைத்துக் கட்சி மாவட்ட ஊராட்சிக்குழு உறுப்பினா்களும் கூட்டத்தில் இருந்து வெளிநடப்பு செய்தனா்.
இது குறித்து, மாவட்ட ஊராட்சிக் குழுத் தலைவா் யசோதா மதிவாணன் கூறிதாவது:
மாவட்ட ஊராட்சிக்கு அரசால் ஒதுக்கீடு செய்யப்படும் நிதியிலிருந்து அனைவருக்கும் பாரபட்சம் இன்றி நிதி ஒதுக்கீடு செய்யப்பட்டுள்ளது. கூட்டத்தில் நிறைவேற்றப்பட்ட தீா்மானங்களுக்கு மாறாக ஒரு சில உறுப்பினா்கள் அதிகாரிகளின் ஒத்துழைப்போடு பணி உத்தரவு பெற்று திட்டப் பணிகளை செய்துள்ளனா். இது தொடா்பாக மாவட்ட ஆட்சியா் விசாரணை மேற்கொண்டுள்ளாா். விசாரணையின் அடிப்படையில்தான் முடிக்கப்பட்ட பணிகளுக்கு நிதி ஒதுக்கீடு செய்ய இயலும் என்றாா்.