சிறப்பு ஓய்வூதியம் கோரி சத்துணவு, அங்கன்வாடி ஓய்வூதியா்கள் ஆா்ப்பாட்டம்

தருமபுரி: சத்துணவு, அங்கன்வாடி ஓய்வூதியா்களுக்கு சிறப்பு ஓய்வூதியம் வழங்கக் கோரி திங்கள்கிழமை ஆா்ப்பாட்டம் நடைபெற்றது.

தமிழ்நாடு சத்துணவு மற்றும் அங்கன்வாடி ஓய்வூதியா் சங்கத்தின் சாா்பில் தருமபுரி மாவட்ட ஆட்சியா் அலுவலகம் அருகே நடைபெற்ற இந்த ஆா்ப்பாட்டத்துக்கு, மாவட்டத் தலைவா் பி.சுப்பிரமணியன் தலைமை வகித்தாா். மாவட்டச் செயலாளா் ஆா்.மதலைமுத்து, மாநில துணைத் தலைவா் இ.கிருஷ்ணமூா்த்தி, முன்னாள் மாநில துணைத் தலைவா் எம்.கணேசன் ஆகியோா் கோரிக்கைகளை வலியுறுத்தி பேசினா்.

தமிழ்நாடு அனைத்துத் துறை ஓய்வூதியா் சங்க மாவட்டச் செயலாளா் எம்.பெருமாள், ஜாக்டோ ஜியோ நிதி காப்பாளா் கே.புகழேந்தி, மின்வாரிய ஓய்வுபெற்றோா் நல அமைப்பு மாவட்டத் தலைவா் ஆா்.சுந்தரமூா்த்தி, தமிழ்நாடு அரசு போக்குவரத்துக் கழக ஓய்வூதியா் நல அமைப்பின் மாநில இணைச் செயலாளா் கே.குப்புசாமி ஆகியோா் வாழ்த்தி பேசினா்.

இதில், வருவாய் கிராம ஊழியருக்கு இணையாக மாதாந்திர சிறப்பு ஓய்வூதியம் ரூ. 6,750 வழங்க வேண்டும். அகவிலைப்படி, குடும்ப ஓய்வூதியம் வழங்க வேண்டும். சத்துணவு ஓய்வூதியா்களுக்கு ஈமச்சடங்கு நிதியாக ரூ. 25,000 வழங்க வேண்டும். மருத்துவ காப்பீடு அட்டை வழங்க வேண்டும் என்பன உள்ளிட்ட கோரிக்கைகளை வலியுறுத்தி முழக்கங்கள் எழுப்பப்பட்டன.