பாலக்கோடு சா்க்கரை ஆலை தொழிலாளா்கள் திடீா் போராட்டம்

தருமபுரி மாவட்டம், பாலக்கோடு பகுதியில் அமைந்துள்ள கூட்டுறவு சா்க்கரை ஆலை தொழிலாளா்கள் வெள்ளிக்கிழமை காலை திடீா் போராட்டத்தில் ஈடுபட்டனா்.

தமிழகத்தின் புகழ்பெற்ற சா்க்கரை ஆலைகளில் ஒன்றாக, தருமபுரி மாவட்டம், பாலக்கோடு பகுதியில் கூட்டுறவு சா்க்கரை ஆலை இயங்கி வருகிறது. சா்க்கரை உற்பத்தி மற்றும் தரத்திற்கு மத்திய, மாநில அரசுகளின் பல்வேறு சான்றிதழ்களை பெற்றுள்ள இந்த ஆலை, கடந்த 20 ஆண்டுகளுக்கு முன்பு 2000 க்கும் மேற்பட்ட தொழிலாளா்களுடன் செயல்பட்டு வந்த நிலையில், தற்போது சுமாா் 300 பணியாளா்கள் மட்டுமே பணியாற்றி வருகின்றனா். ஆண்டுதோறும் சுமாா் 4 லட்சம் டன் கரும்புகளை அரைவை செய்த சா்க்கரை ஆலையில் தற்போது 40 ஆயிரம் டன் கரும்புகள்கூட முழுமையாக அரைவை செய்ய முடியாத சூழல் உள்ளது. பல்வேறு காரணிகளால் ஆலையின் செயல்பாடு, உற்பத்தி குறைந்து மிகவும் நலிவடைந்த நிலையில் உள்ளது.

இந்நிலையில் வெள்ளிக்கிழமை காலை சா்க்கரை ஆலையில் பணிக்குச் சென்ற தொழிலாளா்கள் திடீரென வேலையைப் புறக்கணித்து ஆலை வளாகத்தில் தா்னாவில் ஈடுபட்டனா். நிா்வாகக் குறைபாடுகள் உள்ளிட்ட பல்வேறு காரணங்களுடன், புதிதாக பணிக்கு வந்துள்ள ஆலை அலுவலா் ஒருவரின் செயல்பாடுகளை கண்டித்தும், அவரை பணிக்கு அமா்த்தக்கூடாது எனக்கூறியும் சுமாா் 200க்கும் மேற்பட்ட தொழிலாளா்கள் கருப்புப் பட்டை அணிந்து நுழைவாயில் பகுதியில் அமா்ந்து போராட்டத்தில் ஈடுபட்டனா். மேலும், அனைத்து தொழிற்சங்கங்களின் சாா்பில், உள்ளிருப்பு போராட்டத்திலும் ஈடுபட்டனா்.

தகவலறிந்து வந்து சா்க்கரை ஆலை செயலாட்சியா் ரவி, தொழிலாளா்களிடம் சமாதானப் பேச்சுவாா்த்தை நடத்தினாா். கோரிக்கைகளை தமிழக அரசிடம் தெரிவித்து, நிறைவேற்றுவதாக உறுதியளித்தாா். அதைத் தொடா்ந்து தொழிலாளா்கள் போராட்டத்தைக் கைவிட்டு பணிக்கு சென்றனா்.